صوت الجماهير ... طالبه التغيير
إسمع ياشرف ... إسمع يا مشير
صوت الجماهير
صوت الجماهير صرخه تنادي
الدم دا .. دم اولادي
سفكوه علشانك يابلادي
علشان تعيشي ف أمن وخير
صوت الجماهير
صوت الجماهير وف كل مكان
في اسكندريه وف أسوان
جرس كنيسه ويا أدان
الكل واقف ف التحرير
صوت الجماهير
صوت الجماهير طالع نازل
لابينافق ولا بيغازل
طالبين حقوقنا بالعاجل
وسؤالنا طب ليه التأخير
صوت الجماهير
صوت الجماهير صوتي وصوتك
صوت الجماهير رافضه سكوتك
من كانوا سبب موتي وموتك
نايمين على ريش نعام وحرير
صوت الجماهير
صوت الجماهير مش هايسلم
ومهما شاف ويل واتألم
خلاص من الماضي اتعلم
والسر ماعدشي ف جوه البير
صوت الجماهير
صوت الجماهير أعلنها بجد
الثوره دي مش ثورة حد
وادي كتف ف كتف ويد ف يد
والصوره واضحه بدون تزوير
صوت الجماهير
صوت الجماهير مش بيساوم
بالثوره حارس بيقاوم
والله أكبر ع الظالم
ودا فوق كل كبير فيه كبير
صوت الجماهير
صوت الجماهير بيشق الليل
ويجيب القمره ل حضن النيل
ودي أول خطوه ف أول ميل
ولسه ياما باقي كتير
صوت الجماهير

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :