قاتل طفليه يروى تفاصيل جريمته.. فيديو جديد

عرضت فضائية "إكسترا نيوز"، اعترافات جديدة لمحمود نظمي، المتهم بقتل نجليه الطفلين محمود وريان، في محافظة الدقهلية، وإلقائهما في المياه.

وقال خلال الفيديو: "فكرت في الموضوع، كانت نفسيتي تعبانة وعندي اكتئاب.. وابتديت أبيع حتة أرض، وإخواتي قالولي متبعهاش وسيبها لأولادك.. واستنى تكون استلمت الدعوى وهيطلعلك فلوس حلوة وبيعها، قولتلهم ماشي".

وأضاف: "فكرت أبعد الأطفال ريان ومحمد عن الحياة ومشاكل الحياة.. حسيت إنهم لما هيكبروا هيلاقوا صعوبة في الحياة وصعوبة في مشاكل الدنيا، وقولت أرحمهم أحسن وهيبقوا دخلوا الجنة".

وتابع: "كان جاي نسيبي في أول يوم العيد ياخد الضحية.. فطلع عيّد على الأطفال وقالي ابقى تعالى بقى.. قولتله ماشي وفي اليوم ده كنت تعبان ومكنتش قادر أصبر أصلا.. بس العيال وعشان عيد.. ومراتي قالتلي خدهم خرجهم وروح عيد على نسايبي.. قولتلها خلاص".

واستطرد: "وروحت عند نسايبي قعدت 10 دقايق وعيدت عليهم ونزلنا وخدت العيال وروحنا حتة اسمها (العيد)، وبعدين طلعت على البحر.. وروحت جبتلهم البلالين والمكان اللي بيكون فيه العربيات والملاهي وكنت واخد برشام (الترامادول).. بقالي خمس سنين بآخد ترامادول".

وأردف: "خدت البلالين وركبتهم القطر اللي بيلف.. وبعدين خرجت وقومت راكب عربيتي وطلعت على طريق المنصورة ولفيت بالعربية وطلعت على طريق إسكندرية.. على طريق الجمالية.. ومن الجمالية طلعت على طريق فارسكور، ومن هناك حصلت الواقعة".

وتابع: "كان في دماغي أرميهم في أي بحر عشان لو أي جريمة تانية هتتعبني نفسيا، لو قتلتهم هتعب نفسيا، لو خبطتهم بسكينة كنت هاتعب، قولت أقرب حاجة وأسهل حاجة يعني، المهم قعدت أطلع على الطريق لقيت هو البحر المناسب ومفيش حد كتير شيلتهم وقومت رميتهم.. ووقفت بالعربية وقولت روح للجنة يا ريان وروحت راميه، ومصرخوش".