لا ترعبوا أولادكم من بابا نويل .....

ماجده سيدهم
على الرغم من تزايد الإقبال من الأحباء المسلميين على المشاركة معنا في احتفالات أعياد الكريسماس ودق نواقيس الميلاد السعيد ..

ورغم ارتفاع شجرة الميلاد في العديد من ميادين مصر والتى يزينها العديد من الشباب والمحجبات بفرحة كبيرة

إلا أنه ماكلت أن تخرج علينا اللحى النص والطواقي الكبس على الفضائيات وبكل حقد وجهل لبث المخاوف والتحذيرات والتحريمات من المشاركة في هذا الإحتفال العالمي المبهج والفريد لميلاد المسيح
.
تمام .. حضرتك لما ترعب الأطفال وتزرع في نفوسهم أن بابا نويل يأتي متسللا في المساء ليخطف الأطفال المؤمنين ويخطف أهاليهم ويعذبهم ويقوم يدبحهم ، ماذا تظن عن نفسية هذا الصغير وكيف يكون سلوكه وأنت على يقين ودراسة تامة أن الخطف والاعتداء والذبح هو الأسلوب الوحيد الذي ينفرد به فكر وتراث أصحاب الجهاد الدموي

بالتالي ياشيخ يكون من الطبيعي لما يمر أي طفل من أمام أي محل يعرض مجسد مبهج لبابا نويل يصرخ بأعلى الصوت خوفا من خطفه ودبحه ...هذا هو تعليمكم الذي لقنته أم لصغيرها حين حاولنا تهدئته و معرفة سبب هذا الفزع المفاجيء..

ولما تحدثت إليها بعض المسلمات المتحضرات بالمحل لتصحيح أفكارها المغلوطة أكدت الأم الضحية وبكل ثقة ماتعلمته طبعا من بهاليل الدين ..( أعوذ بالله ..مالنا إحنا واعياد النصارى الكفرة ..شوية شوية حايسحبوكوا علشان تبقوا مسيحين.. استغفر الله .. اللي بتعملوه دا أقسم بالله خيانة للدين المحمدي وللرسول ..وانصرفت بحدة ) لهنا خلص المشهد .

ياحضرات المشايخ والمجاهدين الكذبة ..أولا مافي حاجة اسمها حد يبقى مسيحي كدا لمجرد أنه اشترى زينة الميلاد أو أخد هدية من بابا نويل ..دا لو وقف على شعر راسه ولو طبقت السما على الأرض وقرأ الانجيل كله وحفظه و قام ونام في قلب كنيسة مستحيل يبقى مسيحي ..و لو اجتمعت أعلى رؤوس الكنيسة علشان تقنع أحد بالايمان المسيحي مستحيل يبقى مسيحي.. المجاملات المشتركة يا مولانا المفروض أنها أمر طبيعي ولا علاقة لها بمعتقد الغير ..

فأي جريمة إنسانيةوأخلاقية هي التي تركتبونها كل يوم في حق البسطاء باغتيال وجدانهم وتخريب نفسية الصغار بالكراهية والعداء وترويعهم من أوهام في نفوسكم أنتم فقط لا تدل إلا عن صغر نفس ..

م الآخر ..مش حا تقدروا تسرقو أفراح الميلاد ولا حاتقدروا تمنعوا صوت الأجراس والأبواق المهللة ولا تقدروا تمنعوا الأولاد لمصافحة سانتا كلوز ..


سيبوا الناس تعيش وتفرح كفاية كذب وبلطجة..سيبوا الأطفال تفرح وتلعب وتشتري الهدايا وتغني وتلبس زي بابا نويل ..أيوه بابا نويل بيوزع هدايا لكل الأولاد وبيحبهم ويتصور معهم ..مابيفرقش يا أحمق بين أي طفل والتاني على الإطلاق ..

سيبوا الشباب و الصبايا الحلوات يرفعوا ويزينوا سوا في شوارع مصر أعلى وأجمل وأروع شجرة ميلاد في العالم كله (حايحصل على فكرة ) ..دي مصر اللي ماتعرفوهاش ولا احترمتوا عبقريتها ولا قدستوا حضارتها ولا حبتوها ..

سيبونا في حالنا وأعيادنا ولمتنا وشجرتنا وفرحتنا وترنيمنا ..دي مصر الحلوة

يا كل أب وأم مصرية احضنوا أولادكوا ..طمنوهم .شجعوهم واشتروا معاهم الهدايا.. شاركوهم وسلموا معاهم على بابا نويل .. وماتسيبهومش فريسة لأي حد يخوفهم ويقتل طفولتهم ..

كل سنة وإحنا طيبين وكل أطفال مصر والعالم بخير وضحكة وقهقهة م القلب ..