مايكل دانيال
عارف ان الكلام اللي جاي وارد يكون #صادم و ده علي خلفيةالحكم بإعدام وائل سعد (الراهب اشعياء المقاري سابقا) قاتل الأنبا ابيفانيوس رئيس #دير_ابو_مقار... بس دي الحقيقة حتي لو كتير مش عاوز يصدق :)
علي فكرة:
- الراهب هو مجرد بشر و كفاية تأليه و قصص اسطورية غير واقعية عن الرهبان، و اي راهب ممكن يقتل عادي جداً لانه في النهاية انسان و تحت الضعف، معاكم ان الاحتمالية ضعيفة جداً مقارنة بالانسان العادي لكن في النهاية ده وارد !
- ربنا و الصلاة مش علاج للنقص و الإكتئاب او الروماتيزم و قصور الشريان التاجي او لأي نوع من الأمراض العضوية او النفسية اللي جوانا... الصلاه حلوة و علاقة شركة مع الله، لكن فيه اختراع اسمة طب و لو الصلاة كانت دواء، ماكانش الاساقفة نفسهم يسافروا يتعالجوا برة و الأولي انهم يصلوا، يعني الصلاة مش ها تمنع محاولة انتحار راهب نتيجة الاكتئاب اللي المفروض علاجة هو طب نفسي و دواء و مش هاتمنعه ان يكون عنده ميول سادية مثلا او غيرها من الأمراض النفسية :)
- الوعي الجمعي عندنا، و كثرة التعاليم اللي فيها تبجيل و تفخيم للرهبان مخلي كتير مش مستوعبين النقطتين اللي فوق، بس دي الحقيقة ان الراهب شخص عادي و مش افضل مني و منك، وانه ممكن يقتل و ممكن يحاول الانتحار لانه بشر زي ما قلنا، بس مش معني كده اننا نفقد ثقتنا في الرهبان لو ثبت تورط احدهم في مقتل الأنبا #ابيفانيوس لان اي مجتمع - حتي لو ديني - فيه ناس صح و ناس غلط عادي جداً :D :D
- انفصال الراهب عن العالم - حتي لو كان اختياري - ممكن يعرضة لأزمات نفسية و خصوصاً اللي بيتوحد ... طبعاً دي مش قاعدة و لكن ده وارد يحصل لان الصحة النفسية للفرد مرتبطة بتعاملاته مع البشر و وجودهم في محيطة مهم جداً علشان يفضل انسان سوي لانه بيحتاج السند و الونس و الحضن و الطبطبة و كل ده مهم جداً لصحته النفسية، و هنا انا مش بناقش فكرة الرهبنة او مدي صحة فكرة التوحد لكن دي ملحوظة فكرت فيها فحبيت اشارككم بيها ;)
- اخيراً ان الراهب مش افضل حد في الكوكب و مش احسن من المسيحي العادي، لان ربنا خلق كل واحد فينا ليه دور في الحياة و دور مهم و بالنسبالي مجدي يعقوب افضل من رهبان كتير لانه فعلا سفير حي و فعال للسيد المسيح في امانته و عطاؤه و مفيد فعلاً للبشرية...
ولو الراهب احسن مننا يبقي كلنا نترهبن بس هل هو ده اللي عايزة ربنا مننا ؟!
ولو كلنا اترهبنا فين المهندس اللي ها يبني الدير، او الدكتور اللي ها يعالج اي حد يصاب اثناء البناء، او اللي ها يصنع بوتجاز علشان الناس دي تاكل او ...او... !
من الآخر فكرة الافضلية هي فكرة #عبثية جداً و الافضل فعلاً هو اللي بيراعي ربنا في صلاته و معاملاته مع اللي حوالية، يعني مش شرط ان الافضل هو اللي عايش للتعبد و بس ;)
اتمني اننا نقبل الحكم بألاعدام لانه بشر ممكن يخطيء و لإننا مش قضاه و مش قدامنا أوراق القضية و الحيثيات و المحاضر علشان نقول ان فيه (تلفيق) من عدمه :)
