انخفاض أسعار السيارات يفتح باب «العروض».. وخبراء ينصحون بالشراء

«دلوقت هو أفضل وقت للعميل يقدر فيه يشترى عربية».. هكذا رأى أحمد الديب، خبير سيارات، موضحاً أن السبب الرئيسى وراء عروض بعض وكلاء شركات السيارات يرجع لوجود مخزون كبير وفائض فى الموديلات القديمة، وقال: «كل واحد عاوز يتخلص من السيارات اللى عنده قبل ما تنزل الموديلات الجديدة، عشان كده الأسعار نزلت شوية الفترة دى»، مضيفاً: «حملة خليها تصدى كانت موقفة الدنيا خالص فى السوق، التجار بيحاولوا يقاوموا بعمل عروض وتخفيضات فى الأسعار».
 

وبحسب «الديب» فإن هناك شركات خفضت الأسعار بما يتراوح بين 5 و20 ألف جنيه، وتابع: «فيه شركات طرحت الصيانة مجاناً».
 

وأرجع أمجد الفقى، خبير سيارات، سبب تراجع الأسعار إلى حملة «خليها تصدى»، وقال: «السيارات اللى نزلت أسعارها كلها تجميع مصرى»، ناصحاً المواطنين بالشراء حالياً كأنسب فترة من حيث الأسعار، مضيفاً: «التجار كمان مستفيدين، عاوزين يمشوا حالهم قبل نزول الموديلات الجديدة».
 

وقال علاء السبع، عضو شعبة السيارات باتحاد الغرف التجارية، إن السيارات «الـ١٦٠٠ سى سى» انخفضت أسعارها بنسبة بين ٣٪ و٨٪، بينما تتراوح نسبة الانخفاض بالسيارات التى تتعدى «٢٠٠٠ سى سى» بين ٢٠٪ و٢٢٪، مضيفاً: «الفترة الحالية مناسبة جداً للزبون اللى محتاج عربية، لأن فى يونيو الأسعار هترتفع».