منتدى الشباب ينعش مبيعات أسوان: ندوات الصبح و«شوبنج» بالليل

 

«المنتدى بالنسبة لنا بيبقى أيام للرزق، الناس بتحضر وتسهر بالليل وتتمشى فى السوق وتشترى»، بحسب عوض أنور، تاجر مشغولات يدوية وجلود، والذى استعد للمنتدى بطريقته الخاصة، من خلال بعض المشغولات اليدوية، المصنوعة من الجلود والخوص، والخرز: «شنط، أطباق، طُبل، إكسسوارات». أسعار بسيطة يضعها «عوض» لمنتجاته، احتفالاً بإقامة المنتدى بأسوان: «الشنطة من 50 لـ80 جنيهاً، والأطباق النوبية بين 70 و100 جنيه، وشغل الخوص بين 50 و70 جنيهاً»، على خلاف سعرها المحدد طوال أيام السنة: «كان بالنسبة لنا الموسم فى شهر 12 و1، لكن دلوقتى المنتدى خلق موسم كمان لنا. البلد بتبقى زحمة وفيه إقبال على الشراء».

 

الإقبال الذى تشهده المحافظة فى الفترة الحالية يُعوض محمد عبدالله، تاجر عطارة، بإحدى أسواق أسوان، الخسارة التى يتعرض لها نتيجة حالة الركود، التى تشهدها الأسواق التجارية: «اللى جاى المنتدى لازم يعدّى علينا يجرب منتجاتنا وعطارتنا القائمة على الأعشاب الطبيعية، بيشتروا ليهم ولأسرهم اليومين دول، وبنفضل صاحيين أغلب الوقت، ونعمل ورديات داخل العطارة عشان نلاحق على الزباين»، مشيراً إلى المنتجات الأكثر رواجاً لدى الزبائن، سواء من المصريين أو الأفارقة: «الفول السودانى، الشطة والبهارات، والمنتجات العطرية اللى بتقبل عليها البنات عشان طبيعية مش مغشوشة».

 

للمراكب النيلية نصيب من هذا الرواج، حيث يتسابق شباب المنتدى والزوار على القيام برحلات نيلية: «ناس بتيجى من بعد الساعة 4 العصر عشان ياخدوا مركب، وغيرهم بيفضّلوا الجولة تكون بالليل، وعلى حسب الأفراد بنحدد السعر يعنى الـ5 بـ150 جنيه فى الساعة»، يقولها محمد عويس، صاحب مركب نيلى، والذى يشعر بانتعاشة فى عمله هذه الآونة بسبب منتدى الشباب: «الفترة اللى فاتت كان المركب واقف، ومفيش إقبال، لكن اليومين دول الناس بتحضر وبتنشط السياحة».