قال أحد شهود العيان في واقعة مقتل إمام زاوية بمحطة التعاون بفيصل، إن مشادة وقعت بين الإمام والقاتل قبل صلاة الجمعة مباشرة.
وأضاف خلال تصريحات خاصة لـ"الوطن": "الراجل جه وقال للإمام اقرأ آية الكرسي مرتين، قاله مش هقراها الجمعة دي، قاله هتقراها غصب عنك، فالإمام قاله هقراها الجمعة اللي جاية".
وتابع: "المصلين ردوا عليه وقالوله الإمام محدد خطبته، واللي هيقراه فيها ولو مش عاجبك امشي، وأول لما الإمام سجد أول سجدة، اتقدم وداس على الناس وإداله 3 طعنات في ضهره".
واستطرد: "القاتل معندوش أي مشاكل نفسية ومقيم جنبنا في الدور الرابع، عمر الإمام ما أضر حد وكل جمعة بييجي ولا عمره زعل حد وعنده 27 سنة ولسه متجوز ومعاه عيلين".
وأوضح: "محصلش أي خلاف قبل الخطبة غير بتاع قراءة آية الكرسي، وسمعنا الإمام بيقول (آه) 3 مرات، وواحد من الناس كان قاعد حذره إنه ممكن يحصل حاجه النهارده، ولما مسكناه قال دا من إخوان إبليس".
ولقي إمام مسجد "الرحمة" في شارع الأمراء بالهرم، مصرعه أثناء صلاة الجمعة، جراء تلقيه طعنات من شاب.
وأفادت التحريات، بأن المتهم البالغ من عمره 42 سنة تخطى صفوف المصلين أثناء الركعة الثانية، وسدد 3 طعنات في جسد المجني عليه، الذي سقط غارقا في دمائه، ولفظ أنفاسه الأخيرة قبل نقله للمستشفى.
وتمكن المصلون من القبض على المتهم، وجرى تسليمه إلى قسم شرطة الهرم للتحقيق معه.
