بقلم: مراد موريس
عسكرى جيشنا يا بطل يا مغوار , ايه يا وله الشجاعة و الهمة و الرجولة دى كلها . يا سلام عليك يا كبير و انت ماسك بالعصاية بالكهربا و الشوم و هاتك ضرب طاخ و طيخ و طاخ و طيخ فى الواد الكافر الجربوع للى اسمه رائف ازاى الواد التافه لما ينضرب يقول أه ؟؟ ازاى يصرخ و يقول حرام لما نهدم كنيسته او نقتل اخوه او حتى نخطف اخته ؟؟ . بس بجد يا واد كنتوا رجالة يا سلام عليكم و صورتكم فى الفيديو انت و زمايلك ال 15 متجمعين حوالين الواد و هو واقع على الارض بيصرخ و بيستعطفكم ارجوكم سيبونى و صدقونى انا مصرى حتى شوفوا دا لون جلدى هو لونكم دا انا حتى كلامى هو نفس كلامكم يا سلام عليكم و انتم متجمعين حواليه زى الكلاب لما تتجمع حوالين حته لحمة ..
الله الله على قائدكم للى جه يشجعكم يا ترى مافيش مرة قالكم ان الرجالة لو اتجمعوا على ضعيف علشان يضربوه و يقتلوه اكيد دى ما تبقاش رجولة دى تبقى و لامؤاخدة خسة و ندالة . لكن البطولة و الرجولة ظهروا عليك يا واد و انت سايق الدبابة و المدرعة و مافيش مانع لو كانت طيارة رايح جاى تلعب بيها على اجساد الشباب و الرجالة و الاطفال ايه يا واد النخوة دى و الشجاعة يا ترى امتى اتعلمت السواقة بالبراعة دى ؟؟ يا ترى ايه كان شعورك وانت بتدوس عليهم ؟؟؟ ايه رايك فى صوت ازيز عظامهم و هى بتتكسر تحت عجلاتك ؟؟ صوت موسيقى جميل مش كده ؟؟ اول مرة تسمعه ؟؟
الاطفال و الستات تتطحن بقوة مش جايز واحد منهم يبقى اخوك و لا اختك و لا حتى جارك و لا ابوك ؟؟؟ مين قال لك يا بطل تدوس عليهم بالدبابة و تسحقهم زى الكلاب و لا اقولكم حتى لو كلاب كنت اكيد هاتحس بيهم و مش معقول لو كنت صحيح انسان ها تكمل و تدوس عليهم ؟؟ مين للى قالك تقتلنى كده دا انا مصرى زييى زيك ؟؟ يا ترى الشيخ قالك ايه عنى ؟؟ قالك كافر فاسد ظالم ؟؟؟ قالك اقتل و اضرب و اسحق . تقدر تقولى امبارح جالك نوم ؟؟؟طب صورتى ماجاتش فى بالك و انا بتقطع تحت عجلاتك طب صوتى ما جاش فى ودانك و انا بصرخ من كتر الامى ؟؟؟
طب و النبى يا بطل دور كده فى عجل مدرعتك اصل يظهر نسيت حتة منى عندك مش عارف هى ايدى و لارجلى و لا عينى ما تزعلش لو كنت تعبتك بكلامى و ازعجتك بصراخى ؟؟؟ اه صحيح نسيت اقولك هو صحيح بعد ما موتنى تحت عجلك انا هاروح النار و انت اكيد ها تروح الجنة ؟؟؟ ضحكوا عليك اصل اكيد الهنا عادل و لو كان الانسان ظالم . عارف ليه اصلى كنت بحبك اصل مسيحى جوه كنيستى للى اتهدت فوق دماغى كان بيقولى لازم تحب عدوك و انت بجد حبيبى مش عدوى انا على فكرة مسامحك نام و اطمن مهما عملت برضه بحبك .
