كلمات: رمزي حلمي لوقا

تحية لأرواح شهداء ومصابي ماسبيرو، جميعهم، ولا نخص مينا وحده بالتحية، فكلهم سواء، قدموا أرواحهم الطاهرة النقية من أجل قضاياهم العادل.

مينا حي
***
مينا حــيّ
مـينا مش ممكن يمــوت
***
مينا جوة قلوبنا ضيّ
نبرة عايشة في كل صوت
مينا نسمة في كل حيّ
فكرة ما يغيبها موت
شُعلة في الضلمة تبان
طول ما تتفتح ببان
كانت زمان
متقفلة
أمام طوفان
الأسئلة
المشكلة
والمهزلة
تدهس ولادنا الدبابات
***
مينا مات؟!..
لأ... مينا حيّ
مينا مش ممكن يموت
***
مينا صوت في الحق هادر
هو صرخة كل صابر
مينا للمظلوم لسان
مينا كان وسط الميدان
يوم ما قالو الثورة قامت
والشيطان في الحق ساكت
لما طالت
لما باخت
مينا قام هز السكات

***
- مينا مات..؟!
- لأ.. مينا حيّ
مينا مش ممكن يموت
***
مع إنها لحظة زمن
مع إنه كان لابس كفن
ولكنه بيحب الحياة
ولأنه بيحب الوطن
ويجود بروحه عشان رضاه
ما كانش ممكن يهمله
أو يخذله
أو يؤذي حد ويقتله
لو كان مخبي أسلحة
ما كانش راح في المذبحة
ولأن مينا كان أسد
ما هربش من صوت الدانات

***
- مينا مات..؟!
- لأ.. مينا حيّ
مينا مش ممكن يموت
***
قالوا مينا راح بلاش
كدبوا
مينا اليوم دا... عـــــــــــــاش
وقبله عاش مليون شهيد
إيه الجديد..؟؟!!
باختصار..
مينا كان ميت فعاش
عاش يا صاحبي
وأي عيشة...!
وللا فاكر دية عيشة..؟!
دية..! عيشة..؟!
إياك تكون ما فهمتهاش
وإللي ضحى ما انتهاش
***
تبكي...!
تبكي ليه..؟!
كفاياك خيابة
تبكي ليه..؟!
ما بلاش عبط
مينا أخونا
شهيد قبط
واللي مش عارف نقوله
يعني إيه دا
"شهيد قبط"
تلاقيك ما تعرفش الحكاية
***
مينا دلوقتي فين...؟
ومين معاه...؟
آآآآآآه
يا هناه...!
قول معاي
يا هناه
تبكي..!
يبكوا عليك
يوم ما تتنعم معاه
قول معاي
مسيحنا جاي
ومينا حيّ
مينا حيّ
***

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :