كتب – محرر الاقباط متحدون ر.ص
علقت الكاتبة الصحفية "أماني موسى"، على خسارة المنتخب المصري أمام جنوب أفريقيا بالأمس وخروجه من بطولة الأمم الأفريقية التي تستضيفها مصر حاليا .
وكتبت موسى عبر حسابها الشخصي على موقع التواصل الاجتماعي "فيسبوك"، بعض الدروس المستفادة من خسارة المنتخب وخروجه من أمم إفريقيا 2019 وجاءت كالتالي :
1- مظاهر التدين والدعاء والسجود وألقاب منتخب الساجدين وغيرها مش بتنجح.
2- ربنا بيقف مع المجتهد مش مع المتدين النصاب المتحرش "ولكل مجتهد نصيب" مش ولكل متدين نصيب.
3- البلد كلها عارفة أن مصر وشعبها بقى عنده لوثة دينية وتدين ظاهري مصحوب بفشل وانعدام أخلاق وضمير ومهنية وكفاءة وكله.
4- البلد كلها عارفة فساد اتحاد الكرة وإهدار ملايين حتى أن أحد الصحفيين الكبار قال الملفات موجودة وجاهزة، طب محدش حاسبهم من قبل ليه؟ لو كان المنتخب نجح وكمل كانوا هيشيدوا بأداء الاتحاد وإنجازاته ويتغاضوا عن الفساد المالي والإداري؟ دة مدلولاته وحشة أوي فكر فيها.. بس مش كتير عشان صحتك النفسية والجسدية.
5- إحنا رد فعل مش فعل.. نتحرك بس بعد ما تقع المصيبة.
6- وفق تصريحات رسمية تم الاستعانة بخبراء في مجالات مختلفة عشان التنظيم للبطولة وتهيئة اللاعبين والاستادات وكله، ياريت الدولة تستعين بخبرا لمواجهة الإرهاب وتخليص الشعب من رجال الإرهاب والفتنة وأفكارهم المتوغلة.. مش بالذمة دي أولى!
7- كتير من الناس والشباب فقدوا حماستهم لتشجيع المنتخب الفاشل يبقى الشاب بيكح تراب عشان يتفرج على ماتش يشجع فيه لعيبة (....) بياخدوا ملايين، وحتى بالملايين دي مش عارفين يجيبوا أجوان.
8- المنتخب الحقيقي منتخب الجيش بسيناء ضد منتخب الإرهاب الدولي، أما منتخب وردة وصلاح لا يمثل الكثيرين.
9- ياريت يتم توجيه أموال الاتحاد واللاعيبة الخرعة دي لأنشطة ثقافية حقيقية للشباب وأهو فرصة نستعين بخبراء أجانب عشان يضعوا الخطة الثقافية لمواجهة الإرهاب.
10 - إحنا متهزمناش بس في ماتش كورة لكن انكشفت هزيمتنا في معركة الحداثة والعلم والثقافة الحقيقية قصاد معركة التدين الزائف.. في معركة الأولويات وتخصيص الملايين للهباء وليس في مكانه الصحيح من مسارح وفنون والعاب أخرى.
