كتب – محرر الاقباط متحدون ر.ص
انتقد الباحث نجاح بولس ، بعض الأشخاص الذين يسترزقون من الملف القبطي من اجل جني مزيدا من الأموال بزعم أن ذلك يدور في فلك "ملف المواطنة"، ويختفون في أوقات الشدة التي تعصف بالأقباط .
وكتب بولس عبر حسابه الشخصي على موقع التواصل الاجتماعي "فيسبوك"، قائلا :" اللي أعرفه لما حد بيسترزق من ملف معين بيستثيره أي أحداث متعلقة بالملف ده وبتأثر عليه .
وتابع :" إنما يبقى في عشرات من الأقباط وغيرهم بياكلوا عيش من ورا ملف المواطنة ، وضيوف دائمين على موائد ومؤتمرات المواطنة اللي بتنظمها المؤسسات القبطية سواء الأهلية أو الدينية ، وطبعاً بيروحوا بيتهم وفي جيبهم ظرف مليان ، وتلاقيهم في أي حادث طائفي أو قضية بتعصف بمبدأ المواطنة عاملين ودن من طين وودن من عجين ، ولا أكأنهم عايشين معانا في نفس البلد ، دا يبقى إستنطاع وبجاحة ودناوة وعفانة بطن.
وأضاف :" والعيب على المؤسسات اللي بتدعيهم وبتدفعلهم وهي عارفة أن الموضوع بالنسبة لهم مجرد أكل عيش ، ومش هانروح بعيد الشيخ سالم عبد الجليل وعبد الله رشدي كانوا ضيوف دائمين في مؤتمرات المواطنة بالهيئة القبطية الإنجيلية ، بياكلوا ويملوا بطنهم ويأخذوا الظرف المليان ويروحوا يصدروا فتاوى بتكفير الأقباط ووصف عقيدتهم بالفاسدة.
واختتم :" ما فيش دم ولا كرامة ولا نخوة . طب حتى حللوا اللقمة اللي بتاكلوها !!.
