كتبت – أماني موسى
توفيت صباح اليوم فتاة محافظة أسيوط، مريم، إثر تناولها مصل فاسد ضد السعار.
وأوضح أحد أبناء قريتها أمباية حسني، قائلاً: مريم خريجة تربية فرنسية من قرية شقلقيل إحدى قرى محافظة أسيوط وواحدة من أفقر قرى الجمهورية، طالبة مجتهدة خدومة قدرت تخلي كل أهالي قريتها يحبوها عشان بتدي دروس لعيالهم بأجر رمزي جدًا.
وأضاف، وهي قاعدة في البيت دخل كلب ضال وخربشها في أيديها ...بيوت الصعايدة الطبيعي أنها مفتوحة طول النهار، حادثة عادية حلها تافه زي أي حد بيجيله انفلونزا مفروض كانت تاخد عدد معين من الحقن المضادة للسعار والمتعارف عليها في أي حتة وتخف.
أبوها أخدها لمستشفى المركز "مستشفى أبنوب" وأخدت عدد من الحقن على أيام لكن بعد الحقنة قبل الأخيرة بدأت تتعب لغاية ما دخلت في غيبوبة كاملة بعد شلل في الجهاز العصبي المركزي، والسبب كان انه الحقن المضادة للسعار فاسدة نتيجة سوئ تخزين أو صلاحية منتهية، ولحد الآن مفيش تحقيق.
وتابع، مريم ماتت النهاردة وسابت حسرة في قلب أهلها لا يمكن تخف وأهل قرية كاملة بيشيعوها وهم عارفين انه ممكن يبقى الدور على أي حد فيهم، مريم ماتت لأنها من الصعيد من قرية فقيرة الموت لأهلها سهل جدًا لو مكانش في قطر أو ع الصحراوي يبقى من المرض وقلة الرعاية الصحية والفساد، وكأنه مكتوب ع الصعايدة لبس الاسود والحزن.
