كتب – محرر الاقباط متحدون ر.ص
أشادت الكاتبة الصحفية "أماني موسى"، بـ "محمد علي باشا"، مؤسس مصر الحديثة ، موضحة انه اهتم ببناء الإنسان المصري قبل أي شيء لذلك أرسل بعثات مصرية إلى الخارج لتلقي التدريب ، ما جعل مصر تنهض في عهده .
وقالت موسى عبر حسابها الشخصي على موقع التواصل الاجتماعي "فيسبوك"، محمد علي لما جه يحكم مصر اهتم ببناء الإنسان وعمل بعثات علمية للخارج وتدريب وغيره، بدءًا من عهد عبد الناصر إلى الآن مفيش حد من اللي توالوا على حكم مصر حط في باله خطة بناء الإنسان وأعتبرها أولوية، ولذلك فضلنا سنين وسنين زي ما إحنا بل من سيء لأسوأ عالمستوى الحضاري الفكري الإنساني، فضلنا سنين نطور في الحجر وتغافلنا تطوير البشر، رغم أن العنصر البشري هو اللي يضمن نجاح واستمرارية الحجر.
واستطردت موضحة :" حادثة محطة مصر المروعة بسبب عنصر بشري تم إهماله على مدار عقود فأصبح عندنا إنسان منعدم الضمير، بلا أي إحساس أو مسؤولية، وخد في طريقه كم روح عالماشي وكم شخص هيعيش بعاهات مستديمة وتشوه.
وأضافت :" حوادث الإرهاب كلها.. بطلها عنصر بشري تم إغفال تطوير عقله ومهارات التفكير عنده، فبقى متبرمج بشوية أفكار بينفذها زي الروبوت من غير أي منطق أو تفكير ..حالة التشنج الفكري والإرهاب الفكري المنتشرة حتى بين الصفوة وإعلاميين وكُتاب وغيرهم، نتيجة إهمال تطوير العنصر البشري.
كما أوضحت ، معظم المشاكل اللي بتواجهها الدولة زي ختان الإناث، الزواج المبكر، غول الزيادة السكانية، العنف ضد الإنسان والحيوان، الجهل، التعصب، التطرف، كلها مشاكل مجتمعية بتبدأ من الدماغ -أن الشخص مقتنع بصحتها- وهتنتهي برضه من الدماغ.. هتنتهي بالشغل على الإنسان ودماغه، ساعتها كل المشاكل دي هتتحل، لأن خامة الإنسان الواعي اللي عندك بترفضها وواعية لخطورتها.
واختتمت :" دة أجدى بدل ما أننا عمالين نلف في دايرة مفرغة من سنين.. العنصر البشري هو أساس نجاح الدول، وتقويمه وتهذيبه وتخليصه من أفكار المستنقع بداية دولة قوية، بجوار بناء الحجر والبيوت والكباري والمدن.
