كتبت – أماني موسى
حذر د. علاء حمودة، من حملات القتل الممنهجة لكلاب الشوارع وما يحدثه ذلك من خلل كبير في التوازن البيئي، أدى لظهور ثعبان الطريشة بعدة مناطق مثل المنوفية والبحيرة وأخيرًا التجمع.
وقال حمودة، في تدوينة عبر حسابه بالفيسبوك، قلنا ألف مرة.. الكلاب بتقتل الثعابين.. وبتهاجم الثعابين السامة.. والقطط كمان زيها.. يمكن بتهاجم ثعابين أقل حجمًا.. بس الاثنين بيقتلوا الثعابين.
ودخلنا في قصص لأ أصل صوتهم بيخوف.. أصل الإزعاج.. أصل بنتي بتخاف.. أصل في كلب هاجمني مرة.. فيبقى نقتلهم كلهم، بالتالي لو في بني آدم هاجمك مرة المفروض نبيد لك البشر!
وتابع، منطق غريب مايصدرش من طفل.. لو حطيت لهم فضلات أكلك على جريدة وللا في طبق بلاستيك محدش منهم حيقربلك.. وبالعكس.. حيعرفوك. أختي كانت بتحط أكل لكلب ضال في سيدي جابر.. فبقى بيمشي وراها لغاية رشدي.. يحميها لحد ما توصل البيت.. وبعدين يرجع!
واستنكر قتلهم من خلال جهات حكومية، قائلاً: الأسوأ أنه بتلاقي صانع قرار متبني القرارت الحميري دي.. في محافظة وللا حي.. فيجري يسمم الكلاب والقطط.. ويرجع مكتبه كده وهو حاسس بالانتصار وأنه شاطر.
المدن الجديدة كلها مبنية على أطراف الصحارى. يعني الكلاب والقطط الضالة بتصد عن المدن دي ألف ثعبان وعقرب وديب.. مجرد ريحتها في المنطقة بيمنع الكائنات دي أنها تقرب.
محدش بيتخلص من الحيوانات الضالة في مدينة بالكامل إلا لو متخلف عقليًا.. سويسرا فيها حيوانات شريدة.. نيويورك.. دبي!! أنت عايز إيه؟
الأهم لما كنت بتدخل في جروب وللا في مصيبة تناقش سكان المدن دي اللي بتدعو لقتل الكلاب والقطط.. يشتموك!!
دلوقتي الثعابين بتهاجم سكان التجمع!
لأ ومش أي ثعابين.. "حيّة الرمل المقرنة Saharan horned viper".. بيسموها "طريشة".. جرعة سمها المميتة للأطفال 20 "ملي"جرام.. وللكبار 40 - 50 ملليجرام.. السم بيسبب تحلل للأنسجة ونزيف وقيء وتورم وبول دموي.. ووفاة أليمة لو ماتلحقتش في أقرب مستشفى.
المشكلة كمان انها بتدفن نفسها في الأرض تمامًا وميبانش منها إلا عينيها. يعني أغلب الوقت أنت مش شايفها.. وابنك اللي بيلعب في الرمل أو في الجنينة.. مش حيشوفها.
طبعًا الاقتراح المطروح حيبقى غبي زي سابقه بكل تأكيد.. حيبقى "قتل ثعبان الطريشة".. وبعدها تيجي تعيط عشان الفئران الصحراوية احتلت المدينة .. الفئران دي اللي كانت بتاكلها ثعابين الطريشة في الصحراء.. قبل ما تتمدد وتيجي تحت بيتك.
نبيدلك الفئران فتنتشر الأبراص.. نموتلك الأبراص فتنتشر الصراصير.. نبيدلك الصراصير فتنقرض التربة الزراعية.. عشان مفيش تربة زراعية من غير صراصير!
ما كانت الكلاب والقطط بتحميك من الأول والتوازن متحقق!
أنا ماشفتش أشخاص فعليًا بالغباء دا والله العظيم في أي مكان.. اللي هو عايز يدمر نظام إيكولوجي كامل.. ويعمل له خلل.. عشان "حمادة يا كماحة بينزعج من صوت الكلب".. و "أسل أنا بخاف من القطط من وأنا صغيرة".. و"أسل في كلب عضني مرة".
معنديش حل بصراحة.. هنيئًا لكم الثعابين..إشربوا بالهنا والشفا.. أو روحوا للشيخ اللي افتاكم بأن قتلهم حلال.. ييجي يزمر للثعابين ويلمهم في كيس خكيش.
