بقلم: مينا ملاك عازر

وقف المرشَّح المحتمل لرئاسة الجمهورية في ندوة بكلية طب "القصر العيني" يخطب في الناس ويشرح لهم كيف يرى "مصر" ذات دور إقليمي كبير- وهذا لا ننكره- وشرح قائلًا إن "مصر" باستطاعتها أن تغلق خليج العقبة على "إسرائيل"- على صباعها يعني؟- لا يا سيدي، مش حايقفله على صباعها، حايقفله على رقبتها، عشان كده حاتتخنق ونقطع عليها حركة التجارة مع إفريقيا.. يا جماعة، "إسرائيل" تختنق، تتنفس تحت الماء، تغرق تغرق تغرق. هو ده الكلام، "مصر" بتتقدم بينا، شفتم بقى التخطيط؟ ولما تتوغل في خطة المرشَّح تكتشف ما هو أنكى.
 

يا ألطاف الله، الراجل بيقول إن لما "إسرائيل" تختنق تبدأ "أمريكا" تديها معونات، فالاقتصاد الأمريكي يتوعك، ويتضايق الشعب الأمريكي، فيسقطوا "أوباما"!! لا يا حبيبي، هو مش حايرشّح نفسه. معقولة بعد ما يتزعم دولة ذات دور إقليمي زي "مصر" يرمرم ويتزعم دولة ليس لها دور ولا محل من الإعراب زي "أمريكا"؟ هو حايسيبهم غنم بلا راع، ما هو لما يسقط "أوباما" والاقتصاد ينهار ما حدِش أصلًا من الأمريكان حايرضى يرشَّح نفسه رئيسًا للجمهورية الأمريكية يا جماعة.. ممكن يبقى ينظر لها المرشح المحتمل للرِئاسة في "مصر" بعين العطف، ويضم "أمريكا" كمحافظة من محافظات "مصر"، ويبسط عليها ظل رعايته، وتبقى كده "إسرائيل" إتخنقت؛ لا معونات، ولا تجارة، ولا ميه، ولا هوا.
 

طبعًا إللي قاله مرشَّح الرئاسة ينتمي للزلابية أكثر منه للجغرافيا؛ لأنه واضح إنه ما يعرفشي إن "إسرائيل" تطل على البحر المتوسط، ولاتفتكروا حايقفل مضيق "جبل تامر" عليها؟ وساعتها بجد "إسرائيل" حاتتخنق منه، وتروح رزعاه حرب زي إللي قامت بيها على "ناصر"، وتبقى هيصة. أو إن ما كانتشي ضربته من ساعة ما قفل الخليج، مش من ساعة ما أغلق مضيق جبل تامر!! صحيح يا جماعة، هو جبل تامر ده فين؟ آه ده مش اسمه جبل تامر ده اسمه جبل طارق، وفي "المغرب".. طب حانعمل إيه في "إسرائيل" دي إللي بسبع أرواح؟ وصحيح، هو صاحبنا ما جابشي سيرة عن قناة "السويس"، حايقفلها ولا حايسيبها مواربة؟ هو صاحبنا درس تاريخ، وعرف إن حرب 1967 قامت بسبب إيه ولا ما عرفشي؟ تفتكروا عرف إنها قامت بسبب إغلاق مضيق تيران إللي متحكم في خليج العقبة؟ تفتكروا إنه درس جغرافيا وعرف أن "إسرائيل" تطل على البحر المتوسط؟ ولا آخر علمه إن "إسرائيل" بتفرفر بس من إغلاق الخليج؟
 

أنا مش عارف الناس دي بتعمل فينا كده ليه؟ هما سايبين نفسهم كده إزاي؟ بجد كده كتير أوي علينا إنهم يتواضعوا ويقودوا بلد ذات دور إقليمي، هو لازم يقود بلد ذات دور عالمي زي "الصومال" مثلًا، يعني يقدر من خلالها يخنق "أمريكا" بأن ينشف مية المحيط الهندي، ومن ثم المحيط الأطلنطي، ويقطع طرق التجارة، لكن إنه يرشّح نفسه عندنا ويخنقنا لا، وألف لا.. هو أحسن حاجة ياخد بعضه ويخنق على نفسه وعلى "إسرائيل" وعلى "أمريكا" بعيد عننا، أصلها مش ناقصة خنقة. صحيح هو ليه ما يحكمشي "قطر"؟ ومن هناك يستطيع خنق الناس كلها بإنه يحرمنا من العلاقات التجارية إللي بين "إسرائيل" و"قطر"، وليس "قطر" فقط بل معظم بلدان الخليج إللي أكيد حاتتخنق أول ما يحكم هو "قطر"، وتقعد تفرفر. هو الدكتور "حازم أبو إسماعيل" ما ينفعشي يحكم "أفغانستان" ويخنق القوات الأمريكية هناك، ويمسكهم زي ما بتمسك العرسة الفراخ، ويخنق فيهم لغاية ما يفرفروا تمامًا؟؟..

المختصر المفيد، ذاكروا تاريخ أو جغرافيا، حمانا منكم الله.

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :