كتب – محرر الاقباط متحدون ر.ص
قال دكتور محمد طه ، استشاري الطب النفسي ، أن" سيجموند فرويد" قال في أواخر حياته أنه يبدو له بعد كل رحلته العلمية والعملية الطويلة إنه لم يكتشف سوى أكثر الأشياء بداهة.
وأضاف "طه"، خلال حسابه الرسمي على موقع التواصل الاجتماعي "فسيبوك"،:" تعالوا ياللا نكتب ونعيد ونزيد ونفكر بعض بأكثر الأشياء بداهة بالنسبة لنا.. واللي هي غايبة عننا في معظم الأحوال.. واللي بنعانى من آثارها النفسية والجسدية كل يوم حرفيا وهي : مش من حق أب أو أم يهينوا أو يشتموا أو يسخروا أو يؤذوا ابنهم أو بنتهم نفسيا، مش من حق أب يمد إيده ويضرب ابنه أو بنته أو يتعدى عليه جسدياً بأي شكل وبأى درجة، مش من حق أب أو أم أو أخ أو أخت أو خال أو عم أو أي حد يلمس أي جزء من جسم الابن أو الابنة بشكل مخجل أو مريب أو متعدى للحدود، مش من حق أب يكتف أو يحبس أو يمنع ابنه أو بنته من الخروج وخاصة للذهاب لمدرسته أو كليته.
وتابع :" مش من حق أب أو أم يجبروا أبناءهم على دخول أو عدم دخول كلية معينة، أو شغل معين، مش من حق أب أو أم أو خال أو عم إجبار ابنهم أو بنتهم على الزواج من/ أو عدم الزواج ممن يرغب/ترغب، مش من حق أب أو أم يبتزوا أبناءهم عاطفياً (علشان يعمل الحاجات اللى فاتت أو غيرها) تحت أى مسم، مش من حق زوج (ولا زوجة طبعاً) يمد إيده على زوجته أو يضربها أو يؤذيها جسدياً أو نفسياً بأى شكل وبأى درجة، مش من حق زوج يرغم زوجته على العلاقة الجنسية تحت أى بند وأى ظرف، مش من حق زوج (ولا زوجة طبعاً) يهين أو يشتم أو يسخر أو يقلل من شأن زوجته بأى طريقة من الطرق، مش من حق زوج يحبس أو يمنع زوجته من العمل أو من الخروج أو من عمل علاقات طبيعية /أو يجبرها عليهم، مش من حق زوج يبتز زوجته نفسياً تحت أى مسمى.
وأوضح :" بالمناسبة أى حد بيجيلى يشتكى من حاجة من دول، باطلب منه فوراً: يقول لأ ويوقف ده بقدر الإمكان. يطلب تدخل حد من الأقارب الموثوق فيهم لوقف الضرر الواقع عليه/عليها. يطلب تدخل أحد رجال الدين اللى ليهم كلمة مسموعة لدى الأب/الأم/ الزوج/الأقارب. يتصل أو تتصل بأي من الأرقام التالية: خط نجدة الطفل: 16000 المجلس القومي للمرأة: 15115 يعمل محضر في أقرب قسم شرطة ويستعين بمحامى/ محامية للحماية ووقف التعدى. واختتم :" البداية دايماً من عندك."
