بقلم: مينا ملاك عازر
المختصر المفيد، يسقط يسقط حكم العسكر.
عزيزي القارئ، لا تندهش وتظن أن هذا هو المختصر المفيد للمقال، فالمختصر المفيد لهذا المقال ستجده في وقته. ولا تتعجب من أنني أكتب المختصر المفيد في بداية المقال، فلا تنسى أن أولًا- المقال ملكي، وأنا حر فيه أكتب فيه ما أريده وأضع الترتيب الذي أريده. ثانيًا- لماذا تتعجب من هذا الترتيب مقلوب الحال؟ فكل شيء في بلادنا حاله مقلوب، ولا أجد أكثر من هذا الخبر الذي سأسوقه لحضرتك لأدلل على صدق كلامي، مع أنني أثق في أن حضرتك حاتصدقني من غيره. وحاتكذَّبني ليه؟ وأنا إللي عمري ما ركبت دبابة ودست على حد، وطلعت وقلت ده حد تاني غيري مثلًا.

الخبر بيقول، إن المتظاهرين الأقباط داهموا مقر المحطة النووية، وفجَّروا بأصابع الديناميت منشآت المفاعل النووي- تقرقش لك كام صباع ديناميت؟ بيقولوا بيعمل دماغ حلوة- وهدموا الباقي بأيديهم– صحة- وانسحب الجيش– رجالة صحيح- وحلت محله الشرطة التي فشلت في منع المتظاهرين– غطيني وصوتي يا سوزان- الذين سيطروا على الموقع وبدأوا في بناء بيوت لهم– ألف مبروك السكن-. إيه؟ بتقول إيه؟ الخبر إللي بأقوله غلط؟ طب استنى أراجعه كده.. آه صحيح أنا أسف. لا مؤاخذة يا ابني، أصل عندي دبابة مسروقة ساعة تروح وساعة تيجي.

خد يا عم الخبر الصحيح، اقتحم أهالي "الضبعة" مقر المحطة النووية، وفجَّروا بأصابع الديناميت –برضه- بعض المنشآت للمفاعل النووي!! وهدموا الباقي بأيديهم!!- ملحوظة علامات التعجب من عندي مش من الخبر- وانسحب الجيش!!!- برضه؟ يا قوي على كل قوي يا رب- وحلت محله الشرطة وفشلت في صد المقتحمين الذين شرعوا في بناء بيوت لهم بموقع المحطة النووية، وانتقل مدير الأمن للضبعة حيث المحطة لكي يقيم غرفة عمليات هناك لدراسة الموقف.


إيه؟ بتقول إيه؟ لا يا سيدي مافيش دبابات داستهم ولا حاجة، ما هي مسروقة يا عم من أيام "ماسبيرو"!! الدبابة إللي حيلتهم اتسرقت، اسكت بقى.. لا يا سيدي ما ينفعهمشي الشيخ "محمد حسان يعقوب"، أصلهم ما هدموش كنيسة يا سيدي، بنقول لك هدموا مفاعل نووي، آسف فجَّروه، وهدوا بعض منشآته، آه مسائل التفجير دي تخص "الظواهري" و"بن لادن" الله يرحمه بقى، يعني كده عايزين واحد يحضَّر روح الأخير أو نخلي "الظواهري" رئيس الوزراء في "مصر" ليتفاهم مع المقتحمين.

يا حبيبي أنا مش قصدي حاجة أعوذ بالله، حاقصد إيه يعني؟ تفتكر أنا عايز الجيش يتوتر وأعصابه تفلت تاني زي ما فلتت في "ماسبيرو"، ويدهس المقتحمين؟ لا طبعًا.. خلاص انفلات الأعصاب ده كانت مرحلة وعدت. لا يا سيدي، ولا عايز بتوع الصاعقة يطحنوا الأهالي المقتحمين، زي ما طحنوا الثوار بتوع أحداث مجلس الثوار. مضايقاك أوي الثوار؟ بلاش يا سيدي، خليهم بلطجية أحداث مجلس الوزراء وثوار الضبعة.. على فكرة أنا مع بتوع "الضبعة" في أن يطالبوا بحقهم عشان ما تزايدش عليَّ، طالما الدولة نصبت عليهم، وقالت لهم إنها حاتعوضهم وضحكت عليهم. تستاهل. لكن بس عايز أسأل سؤال: لماذا لم أجد راجل واحد من إللي دافعوا عن "ماسبيرو" ضد المتظاهرين السلميين وعن مجلس الوزراء ضد الثوار، ودهس دول وطحن وسحل أولئك، يدافع عن موقع خطير نووي؟ يا جدعان موقع نووي ما حدَش يقدر يدافع عنه؟ يا دي الخيبة والوكسة.. بلاش يضربوهم، بس يمنعوهم من تفجيره وتدميره، ده تلاقيه متكلف فلوس ياما.. طب هي مش الدولة مزنوقة ماديًا ومش لاقية، طب على حساب مين إعادة ترميم المنشآت النووية دي؟ لالا على حساب صاحب المحل. بقى يا رب الجيش ينسحب من تأمينه لأهم المواقع الحيوية في البلد، ويسيب المجمع العلمي يتحرق، ويتفجَّر في عهده الكريم خط الغاز عشر مرات؟ لا ده جيش بيأمن بجد!! لكن الحمقة تاخده والجلالة تقوده لما الناس تبص لمبنى مجلس الشعب بعين ردية! لأ ليه حق، بصراحة رجالة بيعرفوا إمتى بالظبط يضبطوا أنفسهم- هو ده ضبط النفخ ولا بلاش إتعلموها بقى-.

المختصر المفيد، يسقط يسقط حكم العسكر. آسف ده المختصر المفيد القديم. ماعلش الجديد يا سيدي، يسقط حكم الإخوان والعسكر إحنا الشعب الخط الأحمر

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :