محمود ابو اليزيد
(انت ازاي حاطط في تليفونك صوره شيخ من برا والقسيس ابو عصايه من جوا
ده كان سؤال رجل في منتصف الستينات او قد يصل للسبعينات من عمره وانا في طريقي للجامعه كان قد جلس بجانبي واستوقفته او ادهشته وضعي لصوره شيخ الازهر في الصوره الشخصيه ثم يليها صوره لقداسه البابا تواضروس الثاني
المهم انا كنت بعمل مكالمه وخلصتها وكنت متشوق جدا اني اتناقش وبالذات لما رأيت في وشه علامات الاعتدال وليس التشدد والتطرف
المهم بدأت كلامي معاه وقلتله اولا ده شيخ الازهر والتاني ده االبابا تواضروس
قالي انت مسيحي
قولتله لا انا مسلم
قالي غريبه يعني ازاي تحط صوره القسيس
قلته بس كدا انت نسيت اني حاطط جنبه شيخ الازهر
قالي بس اكيد في سبب انت بتحبه اوي للدرجه دي
"قلتله ممكن اسألك سؤال انت لو في حد من ولادك بيحس بالاضطهاد وفي ناس بيكفروا ولادك وكل يوم يجيلك تهديد ان ولادك ممكن يموتوا وهما بيصلوا وان انت كمان ممكن تموت وان في حد من ولادك فعلا مات فعلا وهو بيصلي ومنهم اطفال صغيره كانوا بيدعوا لبلادهم بالامن والسلام
واتحرقلك 74مكان للعباده ولما يكون في حد من ولادك عايز يبني مكان يصلي فيه وواحد متشدد مبيعجبوش شكل الكنيسه فا بيحاول بأي الطرق يمنعك انك تصلي
لوحصل معاك كل ده وجه حد قالك قولي مشاكلك وانا هحاول احلها ترد تقوله ايه "
قالي هقوله طبعا
قلتله جميل عارف بقا القسيس ابو عصايه ده (البابا تواضروس) اما جاله رئيس دوله من اكبر الدول الاوربيه رئيس فرنسا وقاله نفس الكلام اللي قولتهولك ده وكان عايز البابا يتكلم عن ان في مشاكل بين المسلمين والمسيحين في مصر عشان يخرج الرئيس الفرنسي يطالب العالم بالتدخل لحمايه الاقباط ويطالب الحكومه بانها تحترم حقوق الاقباط
عارف رد قال ايه
قاله :احنا لايوجد لدينا مشكلات مع اخواتنا المسلمين في مصر ونحن نتعامل كعائله واحده قد نختلف لكننا بالنهايه عائله
لو تقدر تساعدنا فخامه الرئيس ساعدنا في التعليم
لقيته رد بتلقائيه بسيطه وقالي:والله راجل محترم ويشكر ده كدا بيحمي بلده
وكمل قالي بصراحه انا برضوا كنت بحب البابا اللي هو مات ده راجل كان بيحب المسلمين جدا ده كمان كان شاعر
يقصد (البابا شنوده)
قلتله اه البابا شنوده
قالي اااه كان راجل محترم كنت بسمع انه لما كان بيجيله مشكله بين مسلمين ومسيحيين كان بيقف مع المسلمين ومبيحبش الظلم
قلتله شوف اي بابا بيمسك وبيقعد علي الكرسي بتاع مارمرقس وده اول بابا ليهم
فعلا الكرسي بيغيره بس هنا فعلا الكرسي ده يختلف عن باقي الكراسي لانه فعلا بنكتشف انه بيزيده حكمه ومحبه ووطنيه رهيبه
عشان كدا انا حاطط صورته
قالي لا عندك حق فعلا راجل محترم
واستأذني انه محطته جت ونزل وهو نازل لقيته بيقولي ربنا يحميك يابني
-قد ايه اكتشفت اننا فعلا شعب طيب بطبيعته وان فعلا التشدد ده مش من سماتنا
وان شعبنا فعلا مش محتاج غير توجيه وتعليم قوي واعلام وطني بيسلط الضوء علي تاريخنا كله مش جزء من تاريخنا
وان فعلا نفسي جدا يتم تدريس تاريخ الازهر الي جانب تاريخ الكنيسه وقد ايه احنا محظوظين اوي بتاريخنا وان فعلا محظوظين ان كرسي مار مرقس عندنا لان فعلا بقينا محتاجين حكمه ذلك الكرسي في اماكن عديده تعرف وتقدر قيمه الكلمه وقيمه انك تكون مسؤل وخايف علي بلدك وبتحبها
فعلا انا قلت قبل كدا لا يجلس علي كرسي الحكمه سوا حكيم
ولا يجلس علي كرسي مارمرقس سوا حكيم
فعلا كرسيك ايها القديس العظيم لم يجلس عليه سوا حكماء
وانا محظوظ جدا اني قريت بعض سيرهم
اللي خلتني فخور اد ايه اني من البلد اللي فيها الكنيسه القبطيه بنفسي فخري اني من بلد الازهرالشريف
عرفت ان في 1952كان البابا يوثاب جنب شيخ الازهر جنب محمد نجيب اول رئيس لمصر خافوا علي بلدهم وكانوا مع شعبنا
اد ايه ان الرئيس عبد الناصر تحول موقفه بايجابيه تجاه الكنيسه وانه قرر بناء الكاتدرائيه وكان من ضمن المساهمين فيها في عهد البابا كيرلس السادس
ومنساش ان وقت بناها احد الشيوخ وكان معلم بالازهر جمع تلاميذه وطلب منهم تبرع وخدهم وراح يقدم التبرع قابله البابا بنفسه وكان سعيد جدا وفخور بالموقف وان اد ايه احنا شعب طيب
منساش للعظيم في البطاركه البابا شنوده لما قال مصر ليست وطن نعيش فيه بل وطن يعيش فينا
وطبعا ابونا كلنا حكيم مصر البابا تواضروس اللي وقف مع ولاده في 7/3بجانب فضيله الامام الاكبر والفريق السيسي في الوقت ده عشان يقول مصر اللي انتوا عايزنها خراب احنا لايمكن نسيبها
وعرض حياته للخطر ودفع تمن وقوفه بجانب بلده بدم ولاده وهما بيصلوا
قد ايه فخور بيك ايها القسيس ابو عصايه
شعبك كله بيحبك قداسه البابا مسلمين ومسيحين وبندعي ربنا يديمك علي كرسي الحكمه
