بالفيديو.. عمرو أديب: "مقدرش أحب بلا مقابل".. ورجاء الجداوي: "بتستثمر مشاعرك يعني!"

 

تناول برنامج "الحكاية" المذاع على قناة "إم بي سي مصر" الفضائية، ويقدمه الإعلامي عمرو أديب، والفنانة رجاء الجداوي، مسألة "هل الحب بمقابل!! أم بدون مقابل"، حيث تبنى "أديب" وجهة النظر التي تقول إن الحب بمقابل، بينما تبنت "الجداوي" وجهة النظر الآخرى.

 

وقال "أديب":  "أنا مقدرش أحب بلا مقابل.. أحب لما أحب أخد .. أما حب أتحب.. أخد كل حاجة.. اهتمام وفلوس وكل حاجة.. ولا يمكن أعيش أحب بدون مقابل.. رومانسية إية بس.. أنا عايز أدي دلوقتي.. ألقى المقابل بعدها بساعة على طول.. إية المانع أني أخد أكتر من الحب اللي أديه ليها.. أنا كفاية وجودي وموجود في حياتها.. تحمد ربنا.. ولازم أخد مقابل ومقابل جيد.. أي حد فيكم يفكر في حب بدون مقابل يبقى غلطان".

 

وأضاف: "يعني إية الحب عطاء.. يعني مثلا قاعدين ناكل فين الحب!! أكليني.. الحب هو أنك تأكليني".

 

"الجداوي": "اللي بيحب حب حقيقي لا ينتظر مقابل"

 

من جانبها، قالت الفنانة رجاء الجداوي: "اللي بيحب حب حقيقي لا ينتظر مقابل .. لو بتحب حقيقي صحيح لا تنتظر مقابل.. المقابل هو المشاعر.. وقلبي معاك.. لو حصلك حاجة أنا موجودة.. لو المقابل مادي أنا مش مستنياه".

 

وتابعت "الجداوي": "لو أنا عيانه وانت تعبان وعايز حاجة هتحامل على نفسي واقوم وأعملها ليك..الحب كدة.. ولو بعملك كل ده ومش حاسس يبقى فيه حاجة... المقابل في الحب يبقى دخل في شيء أنا محبوش.. ولو الطرف الأخر مدانيش يبقى معندوش دم.. إية الحب المشروط ده!!".

 

وأكدت: "أوعى تسأل واحد تقوله بتحب فلان لية.. لية تربط الحب بالمصلحة.. بتستثمر مشاعرك يعني.. الحب يكون لأني بكملك.. هو الحب بالنسبة ليك هو أكل وشرب بس؟؟".

 

وأجرى البرنامج استطلاع رأي بشأن هذه القضية عبر صفحته على موقع التواصل الاجتماعي "فيسبوك"، حيث أيد 52% من المتابعين فكرة أن الحب بمقابل، بينما أيد 48% من المتابعين فكرة أن الحب عطاء وبدون مقابل.

 

في السياق، قال "المهندس حمدي"، أحد المتابعين، في مداخلة مع البرنامج: "إن هناك حلقة مفقودة في الأمر، ولا يوجد شيء اسمه الحب بدون مقابل، وكأنه حب أفلاطوني "ده مالوش لزمة"، لو عندك حاجة مش عايز تديهاني.. أنا هكرهك.. أنا حبيتك مكنتش محتاج حاجة لكن بعد ما اتعاملت معاك لقيت محتاج حاجة وهي عندك اديهاني.. لكن متدينيش هكرهك.

 

أما "هشام"، فقد قال في اتصال هاتفي: "لو الحب بمقابل ميبقاش حب.. نفترض انك بتحب حد معين عشان حاجة معينة والحاجة دي راحت يبقى مش هحبك.. الحب شعور رباني بيتحرك في العقل الباطن داخل الإنسان".

 

وشدد متصل أخر يدعى "مجدي" على أنه "مقتنع بكلام الفنانة رجاء، ورأيها صائب لأن الحب يجب أن يكون بدون مقابل، لو الحب بمقابل ميبقاش حب.. الحب عطاء".