كتبت - أماني موسى
قال الإعلامي أشرف عبد المنعم، في أول ظهور إعلامي له عبر قناة CTV تعقيبًا على حالة الجدل التي أثيرت من قبل البعض على مواقع التواصل الاجتماعي، أن الكثيرين باتوا يعبرون عن آرائهم من خلال صفحات السوشيال ميديا وهذا تطور طبيعي في الإعلام في العالم كله وليس مصر فقط.
وأضاف في أولى حلقات برنامجه "في النور" أنا مش مستغرب، لكن البعض يعلق كما لو أني جاي من تل أبيب، إحنا كلنا مواطنين بدولة واحدة، ولما بتحصل مشكلة كلنا بنرفع شعار أنه مفيش فرق بين مسيحي ومسلم، لكن ليه لما بتيجي تتنفذ الفكرة دي بيحصل رد فعل مش لطيف؟!
وشدد كلنا مواطنين مصريين في بلد واحدة، وسي تي في جزء من مصر، وأنا مصري، وأعمل في الإعلام منذ سنوات طويلة جدًا، والله شاء أن أتواجد في برنامج في النور والله يعلم إني لم أسعى لهذا، وهي إرادة ربنا.
وتابع، بدأت الاتهامات وأن ما حدث هو تسييس للقناة، فهل أنتم تعرفوني؟ هل أنا كنت مشهور؟ أعرف أنا مين من كلامي مش من الكلام اللي بتسمعه عني، الموضوع لا في تسييس ولا في اتجاه لأي مؤامرة، كل الأمر هو التغيير، والتغيير هو سنة من سنن الحياة الثابتة، ومن لا يقبل التغيير لا يستطيع العيش، المهم أن يكون التغيير للأحسن.
وأختتم، خلي في بالك اللي أنا أقدر أنتقده أنت متقدرش تقوله أو تنتقده، أنا اللي أقدر أقول اللي حضرتك تحرج أنك تقوله، لأني بالنهاية مش محسوب على الأقباط، محسوب على المسلمين.
