«توك توك ديليفرى»، فكرة نفذتها شركة فى مركز بدر، التابع لمحافظة البحيرة، توفر عربات توك توك للمواطنين بأسعار مخفضة، فى محاولة منها لمنع استغلال أصحاب عربات التوك توك لهم.
آيات عبدالناصر، مديرة خدمة العملاء بالشركة، توضح أن الإقبال على العربات كبير جداً: «الناس مرحبة جداً بالفكرة، خاصة أن أصحاب التوك توك فى الفترة الأخيرة غلوا الأسعار بحجة زيادة أسعار البنزين، بياخدوا 5 جنيه فى أقل مشوار».
"آيات": المشروع يخدم أهالى بدر بأسعار فى متناول الجميع
15 عربة توك توك، توفرها الشركة للمواطنين لحل المشكلة: «العربية بتوصل للمواطن فى خلال 5 دقائق لو داخل مركز بدر، ولو خارج المركز بتوصل فى 10 دقائق، إحنا هنا فى القرية كل الأماكن جنب بعض جداً وده كان سبب رئيسى فى تحقيق عنصر السرعة فى الوصول للعملاء».
وتستمر الخدمة على مدار 24 ساعة كاملة: «عشان لو حد عنده حالة طارئة نقدر نوصل له بسرعة طول اليوم وده الهدف، تقديم الخدمة طول اليوم وبسعر مناسب على قد الإيد، فكرة بتخدم المرضى وكبار السن والطلبة».
وتصل أجرة التوك توك إلى 2.5 جنيه، وهى أجرة موحدة. وتروى «آيات» أن الفكرة تم تنفيذها منذ 3 أشهر: «حاجة الناس لتنفيذ المشروع هى اللى شجعتنا ننفذه، إحنا الشركة كانت بتخدم الناس فى عمل تخفيضات على المواد الغذائية والأطباء، بعد غلاء البنزين لاحظنا إن الناس محتاجة جداً دعم ومساندة زى دى».
