ماجدة سيدهم
( افرحوا تصحوا ..)
بشويش كدا..وبمناسبة أعياد الكريسماس وبجولة سريعة كدا  في شوارع المحروسة  لازم حاتنتبه   إن فيه تغيير واضح   بيحصل في الشارع  .. مش بسبب اجتهادات التنوير من هذا أو ذاك   إطلاقا  ..لكن لأن الناس فعلا خلاص اتخنقت وطقت و طفح بيها الكيل  ومسكها  المرض  والغم بسبب  القهر  والضغط النفسي  والتخويف اللي  حضرتك  بتنشره  وكله ضد الطبيعة  وضد الإنسانية وضد الأخلاق والتحضر وضد الفرح ..

طيب  تفسروا بإيه  الانتشار المتزايد   السنة دي  لتزيين  الميادين بشجرات الميلاد  المضيئة والمبهجة  والنوادي وواجهات المحلات والمولات والمطاعم والكفيهات والمكتبات  ..دا غير  عروض الشراء للجذب  بمناسبة  أعياد الميلاد (كرنفال الكريسماس  ) والاقبال  المتزايد  من الناس على شراء شجرة الميلاد ودمى  بابا نويل   لأطفالهم  من دون أي اعتبار  لحناجر  التحريم والفتاوى العدائية ..بالعكس  ملموس جدا  التزاحم بسعادة   للتصوير جنب سانتا كلوز  بأي مكان  حتى لو باستحياء  إلى حد ما  ( دا مش بسبب التنوير  أبدا  لكن لأن الكيل طفح )

*تفسروا  بإية افتتاح  بعض المحلات الجديدة  بالموسيقا  الرائعة والعزف الحر وتغير نغمات الكثير المصاعد بمقطوعات  عالمية   عوضا عن سبحان من سخر لنا هذا  .. 

*تفسروا بإيه   تداول مقاطع  للرقص الشرقي  بموسيقا اعياد رأس السنة ..يامؤمن  دا احنا رقصنا بابا نويل شرقي .(.برضه لأن الكيل طفح ..)

*تفسروا  بإيه أن سيل التهاني  بمناسبة  أعياد الكريسماس  ورأس السنة   والمشاركة الشبابية   داخل الكنائس والتصوير جنب المزاود  وسانتا كلوز  ..ماهو مش معقول نحلل  الجواز من المسيحية ونحرم عيدها ( برضة لأن الكيل بالناس طفح )

* تفسروا  بإيه  تزايد أعداد البنات والستات صغيرات السن  اللي بيخلعوا الحجاب(واضح جدا ) وخصوصا  مع تأثير  بعض الفنانات  من اللي خلعوا  الحجاب  على قطاع كبير من الستات .

* تفسروا بإية  اقبال بعض  الستات المتزايد على لبس البنتاكور  والتيشرتات  الترواكار  مع إزاحة غطاء الرأس  التيربون للخلف...أو البلوزات مكشوفة الرقبة  (بسبب  الضغط  الزيادة ).. .

تفسروا بإيه الاقبال الشديد على صالات تعليم الرقص وصالونات  التجميل  والتاتو   وعيادات الرشاقة  ..(ببساطة مش  بسبب  كلام  التنويريين لكن  لأن الناس اتخنقت ..طقت  ..وخلاص الكيل طفح )

تفسرو ا بإيه تغيير الذوق بالمحلات اللي اتملت كمان بالفساتين والچيبات والألوان المبهجة عوضا عن هلاهيل الأسود بدرجاته

* تفسروا بإيه كم الهجوم المتشدد .( دا على الجانب المقابل).على أعياد الكريسماس  بغباء وشتائم وسباب منقطع النظير إلا بسبب الغيرة   والخوف  بعد ضياع سنين العمر ورا  أوهام وأكاذيب  كلها ضد الطبيعة والحياة  ..

*تفسروا بإيه تزايد  عدد الملحدين  وأغلبهم من الشباب ومن خلفيات سلفية  (لان الكيل طفح  من كل فكر متشدد  ضد الحياة ) رغم ان اللي عندنا مش ملحدين بالمعنى الحقيقي

*تفسروا بايه حسرة أغلب الناس   على زمن الأبيض وأسود وكل مافيه من رقي وجمال وشياكة وإنسانية (لأن المقارنة مرة أوي )..
*تفسروا  بإيه موضة   جديدة  لزفة العرسان  بقاعات  الأفراح  مصحوبة بموسيقا  تشبه جدا الترانيم الكنسية ..(لأن  التطلع للجمال  بيفرض نفسه )

* تفسروا بإية  بلد زي السعودية بتنطلق زي الصاروخ إلا أن دا يؤكد أن راس الأفعى بل  الأفعى نفسها  هنا مش هناك ..

علشان كدا  الفهم  والتحرر والجمال  قادم لامحالة  .. وكل ما حاتضيقوا علينا  الخناق   كل ما حايكون الرفض أقوى من ألف مقال أو  برنامج  تنويري  ..اللي بيغير الناس هو الرغبة الملحة  جدا  في الحياة والفرح    بعد ما ادركوا أنهم ميتين بالحيا .. وهم بيقارنوا  و شايفين العالم بيفرح  وعايش التقدم والرفاهية والتحضر الإنساني.  وماجرالهمش أي  ابتلاء  من كتر  الدعاء عليهم  ..

مهما تغابي البعض   ماحدش  حايقدر  يمنع الحق والفهم ولاحايقدر يقف قدام العقل و الحياة ..

التنوير والنور  حايفرض نفسه من قلب  الناس  ..واتفرجوا على مصر قريب .. والأفعى مسيرها تدخل جحرها للأبد ..حايحصل..