ماجدة سيدهم
وملعون كل  اللي يحرم الفرحة في القلب   واللي من الوشوش يسرق الضحكة الحلوة

وليلة رأس السنة اتلم الولاد الصغيرين ..في دعوة حب وتواصل واهتمام  من راهبات مدرسة العائلة المقدسة بالمنصورة .يوم  مبهر . يمكن صعب  حكي تفاصيله ..لكن ربما  الصورة تحكي شوية عن الفرحة  اللي عشناها  وعاشها الاطفال الحلوين  مع بابا نويل ..كلنا لبسنا كلنا طرطور بابا نويل  ورسمت على وشوشنا ارنب وأسد وقطة وغزالة .. لعبنا واتمرجحنا  ورقصنا كتير  وغنينا وضحكنا وجرينا  بالبلونات  وشوفنا الأراجوز  والبلياتشو  اللي ضحكنا ورقص معانا . وكمان اخدنا هدايا حلوة اوي من بابا نويل  ..

تعرفوا الولاد الحلوين دول يمكن متوفر لهم حاجات مادية كتير لكن بلا استثناء  عيونهم بتصرخ بحاجة واحدة بس .. عاوزين يتحضنوا ..لما يجري عليك ولد  او بنوتة  وهو اللي يحضنك أوي  وكأنه بيقولك ضمني أوي أوي .. وكل شوية يسألك "انت فاكر اسمي ..طيب حاتيجي تشوفني أمتى .." ويرجع يجري عليك من تاني علشان تضمه وتشيله ..

وبعدين يطلع علينا شوية حمقى يقولك  لايجوز الكريسماس وحرام  بابا نويل ..
حرمت عيشة حضرتك يامولانا ..طيب عملت انت إيه بفتاويك وحرمانياتك لأطفال ظلمتهم الدنيا  بفقدان الأهل بأي صورة ..قدمت ايه للمجتمع  وللفئات الضعيفة غير جهل وترعيب  وغباوة   حضرتك ..

ياترى انت بتعرف تحب ..تعرف تطبطب ..تعرف تحضن طفل   يتيم  .. يبقى تسكت وتخرس  خالص  وحرم  على نفسك  اللي انت عاوزه  ..أنت أصلا بتعمل إيه غيرا أنك عبيء لازم يترمي

سيبوا الناس تعيش وتفرح. ..سيبوا الولاد الصغيرين  تفرح وتلعب وتنطلق شوية ..حاتبقوا انتو والزمن عليهم ..مش كفاية أن كل واحد  منهم  ياقلبي  حايروح على ملجأه  ومش حايلاقي حد  يحكيله   عمل إيه أو أخد هدية إيه ..
كفاية توحش وتخمة وجهل وقلة ادب  ...أيوه قلة ادب وفجر ..

ورغم كدا كلنا  فرحنا سوا  وانبسطنا جدا ..

بجد  شكرا من القلب لراهبات مدرسة العائلة المقدسة ولكل مشرفات على الأولاد  ولكل طفل جميل فرحنا بخفة دمه وشقاوته الحلوة ..كان وقت حلو أوي ومثمر  ..

يارب أرجوك طبطب على كل طفل  فقد أهله ..احضنهم أرجوك  أوي ..طمنهم  ...واوعي  اوعى   تسيب طفل يتوجع وماتلحقوش ..ارجوك اوعي ..احفظهم من الشرير وقساة القلب يارب ..أرجوك ..