بقلم : عزمي ابراهيم
الحريـَّة على الأبـواب
غَصْبٍ عنـَّك يا بـَوّاب
فاكر نفسك م الأقطاب
لمّا  بقيـت من النـواب
كـُنْ اخوانجي
كـُنْ سَـلفنجي
كـُنْ وَهــّـابي
كـُنْ إرهـَـابي
كـُن ما تشـاء
هي دي مصـر "فـلا تســتاء"
مش حتلـَبِّس أختي نِقــاب
وتكلفِتــها
وتبرقعـها
وتلفــلف مخـَــها بحجـاب
***

المصرية عفيـفة وحـُرَّة
لا تكون جارية ولا تكون ضُـرَّة
عاشت نـورها زي الشمعة
ذاكْرِت، نجَحِت
دخلت جامعة
مش حتكون الزوجـة الرابعة
أو التالتـة
او حتى التانيـة
ليـها حقوقـها الإنسانيـَّـة
زي الراجـل مِيـَّة المِيـَّة
***
بقت دكتورة وبقت وقاضي
وانـت بتفــتي بكلام فـاضي
طلـَعِت ضمن شباب الثورة
وانت بجهلـك بتقـول عـَورة
***

صاينة عفافــها
وصاينة شرفها
ليـه تسجنـها وليـه تقـرفـها
مهما حاولت بالإرهاب
مش حتلبسـها القبقـــاب
ولا تقعـَّدها جُوا دولاب
***

هي دي روحنـا الحلوة الحُـرَّة
وهي دي مصر بلدنا الخضرة
ولو مش عاجبك ارحـل عنها
شوفـلك صحـرا في بـلاد بـَـرَّة

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :