بقلم: رمزى حلمى لوقا
*** يا إنسان أنا زيك كمان إنسان ونفسى أعيش كما الإنسان بدون تمييز لا بين أديان ولا ع الجنس والألوان بدون فـُـرقة ما بين إنسان وأخوه الإنسان ولا قسمة حدود و اوطان كما فى أول الأزمان أراد الواحد الديان نكون إخوان إله واحد مصير واحد ضمير واحد خلقنا ربنا الواحد صحيح متفردين فى حاجات ولكن أصلنا واحد وكان إنسان و أنا إنسان ونفسى أعيش وأموت إنسان.
*** عايشنا كروب وياما فرقتنا دروب وياما دمرتنا حروب صبرنا ع القضا المكتوب ف كل زمان و أنا عايش بلا عنوان دا أنا مدبوح ف كل مكان ولا بصرخ واقول تعبان دا أنا إنسان و نفسى أعيش وأموت إنسان.
*** لا أنا مارد ولا سجان ولا قصقوصة من بركان ولا زوبعتك الزاعقة فى كل آوان ولا زنزاتك العتمة ولا أنفاسك المحبوسة م الكاتمة انا الايد اللى سابقة الكل بالرحمة دا أنا إنسان ونفسى أعيش وأموت إنسان.
*** ولا ها اقدر أعيش وحدى ولا تقدر تعيش بعدى بتيجى الأزمة وتعدى بتاخد مننا وتدى نعيش الأزمنة الصعبة ونرجع تانى للغـُـربة فليه الفـُرقة والأحزان دا أنا إنسان ونفسى أعيش وأموت إنسان.
*** يا إنسان انا مسكون بنور ضيك وبصرخ م الوجع زيك وحاسس كل آلامك وبحلم كل أحلامك وإسمى من حروف إسمك ودمى صورة من دمك ولو زعلان فى يوم منى ما تزعلشى ولا يهمك أنا غلطان دا أنا إنسان ونفسى أعيش وأموت إنسان.
