شاكوش: تشابه لحن أغنية "بنت الجيران" مع أغنية لمحمد حماقي مجرد صدفة
نفى مطرب المهرجانات حسن شاكوش، ما تردد من شائعات حول وجود خلافات بينه وبين مطرب المهرجانات حمو بيكا، حيث قال: "لا.. مفيش بينا مشاكل.. إحنا اخوات".
وعن تصريحات حمو بيكا، بأن شاكوش لن يستطيع الغناء إلا بعد استئذانه، رد شاكوش خلال حواره في برنامج "نفسنه"، الذي يُعرض على شاشة "القاهرة والناس": "طالما مسمعتش من الشخص نفسه، مش بهتم، إنما أطلع اتكلم عن هجومه عليا من غير ما اسمعه بنفسي مينفعش، فيه كلام صحافة وجرايد مش بصدقها".
وأوضح شاكوش، أن الكلمات واللحن مهمين معًا في أغاني المهرجانات، " فيه ناس بتقول اللحن أهم من الكلمات، وده مش صحيح، اللي كاتب أغنية بنت الجيران مصطفى حدوته، والملحن اسمه مدين، وده لحن لفنانين كبار أوي وده شيء يشرفني إني غنيت أغنية من لحنه".
وأشار مغني المهرجانات، إلى أن الأغنية من توزيع إسلام ساسو، "إسلام ساسو ده بقى ناس كتير ومطربين كبار بيتصلوا بيه عشان يوزع لهم"، موضحًا أنه سجل الأغنية بمفرده، دون المطرب عمر كمال.
وتابع: "اتصلت بعمر كمال قولتله شاركني في الأغنية أنا أغني العالي وأنت تغني الواطي، لحن صوت عمر كان قريب من أغنية حاجة مستخبية بتاعة المطرب الكبير محمد حماقي بس ده طلع صدفة".
