اسأليني وأنا أجاوب... أنا الحبيب المهاود... أنا العاشق لترابك... أنا الغارق ف ضبابك... أنا الحاير... أنا الثاير... على راحتك أنا داير...

اسأليني يا جميلتي.. يا حبيبتي.. إيه اللي سوَّد دُنيتي؟.. إيه اللي موّت ثورتي؟.. هانت عليكِ مذلتي؟.. اسأليني وأنا أجاوب.. ليه كترت ف سماكي جوارح؟.. ليه عيالك هاجرت لبوارح؟..

اسأليني عن الصبايا السبايا.. وعن رياح السموم اللي جايا.. إسأليني عن جلادي.. واللي سارق قوت عيالي.. إسأليني عن عيال خضر الكعاب.. واللي هايم ف الشوارع عُمره داب.. إسأليني يا أميرتي يا حبيبتي.. أنا اللي حُبي جوه قلبي يذيب حديد.. أنا اللي ليكي عُمري أدي وعُمرك انتي يكون مديد..

اسأليني عن دموعي ليه نازلين؟.. ليه ف ضلوعي أكتم آنين؟.. اسأليني ليه ماعدش فيه ياسمين؟.. ليه ف أرضك مش بتكبر رياحين؟.. ليه طحالب مع مخالب يبقى طينك بيها غالب؟.. ليه همومي مش مهمة وف عطائي تبقى لمة؟.. اسأليني ليه حمام أصبح غيلان؟.. والبساريا ف يوم وليلة إزاي حيتان؟..

اسأليني عن السلام.. وأنا أجاوب.. لو لقيت فيه كلام.. يا أميرتي النائمة.. فين أميرك؟.. ليه ما يطبع بوسة حلوة فوق جبينك؟.. اسأليني عن اللي كان.. وأنا هأحكي وأحكي وأحكي مهما كان.. بس إنتِ اسأليني.. بحُبي ليكي ليه تكويني.. إسأليني.

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :