بقلم- مهندس عزمي إبراهيم
الديـن مش مجــرد صليـب أو هــلال
الديـن مش صيــــام ولحمـــة حـــلال
ولا في العِمـَـم ولا في الحجـاب
ولا في الدقــون ولا في النقـاب
ولا ع المنـابر ولا في الخطـاب
***
مش بس ف كنايس، ولا بس ف جوامـع
لا تحـت المـــآذن، ولا جــُـوة الصوامـع
دي مجرد أماكن لأداء الصــلاة
لرفــع الرجـاء وعبـادة الإلــه
***
الديـن لو نفكــَّر
نفهمــُـه أكتــَـر
الديـن قالـوا يُسـْـر
مش شـِـدَّة وعُسـْر
لا هـُوَّ تزمـُّـت ولا هـُوَّ انسيـاب
***
الديـن في الحقيقة أساسه الضمير
والديـن لا يميـِّز أميــر عن فقيـر
وعــدله يساوي الوزيـر والغفيـر
***
الديــن التـآلــف، والديـن حُكــْم عــادل
الديــن في المـودة، والديـن في التعامل
في بيت أو في شارع
في كل المجـامع
في دروب الحيــاة
وديـن كل واحــد خطـأ أو صواب
متــروك للإلـــه
هـو اللي يعلــَم وهـو اللي يحكـُم
في يـوم الحساب
فلا إمـام بيعـرف ولا قسيس بيكشـف
ولا اللي بيخطــب، ولا اللي بيهتـــف
ولا حـــد منـهم مكشوف لـه الحجـاب
***
الديـــن الأخــُــوَّة، محبـــة ورحـــابة
والمـَرء لأخـُـوه
مش حيوان في غابة
وحيـاتي وحيـاتــك حتفـوت كالسحـابة
سـيبــك م القشـور وخليـك في اللبـــابة
وخلي اختيـارك لأحـلى الآيــات
اللي جـات في "الكتــاب"
وميـــِّــز ما بيــن الخـِــراف والديـــابة
وملايكة وعصابة
وفراشـة وذبابــة
وحمامة وغراب
***
الديــن التعامـل لـو تقــرا "الكتـاب"
بالعنـف يرخـَـص
وبالبغـض ينقـَص
الشـــر يعيــــبه ونتيجتـه العـذاب
والخيــر لـو تشـاء
له ميت ألـف بــاب

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :