- إفتح المحضر واكتب عندك ....
- إسمك وسنك وعنوانك
- كوفيدا محمد عبد حفيظ كوفيدا ، الشهير بكورونا ... أربع شهور ونص ... الصين محافظة يوهان جنب عم أحمد أوساكا بتاع الطرشى
- ما هو قولك فيما هو منسوب إليك؟
- وايه هو اللى منسوب إليا؟
- انت متهم بتكدير الأمن العام ، وتهديد السلم الأهلى ونشر شائعات كاذبة والترويج لأفكار هدامة والانضمام لجماعة محظورة والاشتراك فى مؤامرة ماسونية غربية منوفية صهيونية على الدول العربية والناس الحلوة ديه
- ايييييييه ده كله ايه ده كله ؟ إنت فاضل شوية وتتهمنى إن أنا السبب في تعطيل إشارة رمسيس وانا السبب فى الخلاف بين ياسمين عبد العزيز مع اخوها والسبب فى نفخ قاعدة سما المصري ، أقولك ؟ أنا السبب فى بهدلة المصريين الغلابة قدام معامل تحليل الوزارة من إمبارح
- لا يا خفيف ... ده انت عندك قايمة اتهامات تانية كمان .... عندك مثلا ، انت متهم بالتآمر على الإسلام والمسلمين وتعطيل الحج والعمرة وإيقاف السعى والطواف حوالين الكعبة
- وكمان تعطيل الصلوات في الكنايس والفاتيكان والمراقد الشيعية وكل أماكن العبادة
- كده يبقى انت شيوعى ملحد متآمر على كل الأديان؟
- لأ ولا دى كمان .... لانى قريب ح امنع طوابير زيارة ضريح لينين فى روسيا .... إيه رأيك بقى ؟
- انت فوضوى اناركى لك علاقة بمؤامرة فضائية على كوكب الأرض ، اعترف وإلا ح اوديك ورا الشمس
- ولا حتى دى كمان ، لأنى لسه مخلص على نص سكان زحل وكان آخرهم رئيس الجمهورية هناك المعلم عبد النعيم الزحلاوى والست حرمه فكيهة أم ركب
- لا إله إلا الله ... انت مين يا أخى ؟ إنت شيطان ؟
- ولا شيطان ولا نيلة ، أنا كائن عادى ح اخد يومين واختفى زى ما اختفى سارس وايبولا وشعبولا وح ييجى بعد منى اللى ألعن منى وبرضو ح يختفي هو كمان ...
- عموما أنا مش خايف منك لانى عندى مناعة ومتحصن ضدك
- إزاى؟
- أنا حفظت التلات أدعية بتوع الأستاذ عمرو خالد وبقولهم كل شوية والحمد لله
- ع الريق ولا بعد الأكل؟
- ح نهزر ونستظرف؟
- أعمل لك ايه بس ؟ ما هو لما يكون واحد فى مركزك وناس تانى زيك وأفضل منك زى أساتذة الجامعة وأعضاء برلمان ومسئولين ورجال قضاء ورجال قانون وأطباء ومهندسين وناس هاى لايف المفروض انها على قدر عالى من الثقافة ، قاعدين ترددوا الهبل ده وتعيدوا وتزيدوا فيه ، تبقى هنا المصيبة وهنا المشكلة وانا فى الحالة دى يادوب حتة مشكلة تافهة ولكن الفيروس الحقيقى الفيروس القاتل هو جهلكم وتخلفكم ودروشتكم ونومكم فى العسل .... إنتوا شعوب وحكومات جاهلة خايبة عايشين فى وحل الجهل والخرافة والغيبيات .... غايبين عن الواقع وعن الحياة .... بتتهموا كل العالم انوا بيتامر عليكم وعاوز يقتلكم وفى نفس الوقت بتدعوا ربنا عليهم وبتدعوا ربنا يوفقهم عشان يلاقوا علاج ليا ولغيرى من الأمراض
إنتوا أخطر مرض وأكبر خطر على نفسكم ، بجد أنا حزين عليكم
- قول مهما تقول ، برضو ح تتسجن ح تتسجن وابقى خلى فلسفتك دى تنفعك يا حلو ...
- مفيش فايدة
- هذا وقد أقفل المحضر فى ساعته وتاريخه .... هل لديك أقوال أخرى ؟
