كتبت – أماني موسى
حذر الدكتور نبيل القط من بعض السلوكيات الخاطئة التي تساعد على انتشار فيروس كورونا، قائلاً: أنا عارف إن الموضوع صعب خصوصًا إن إحنا شعب عشري وبنحب نسلم على بعض ونبوس ونحضن بعض، وكمان إحنا شعب تلقائي منحبش حاجة تحكم مشاعرنا الحميمية تجاه الآخرين، لكن الموضوع خطير فعلا والوقاية ضرورية ضرورة النجاة من الموت.
وتابع في تدوينة عبر حسابه بالفيسبوك، لازم تحمي نفسك لأنك لو ما انتبهتش ممكن تصاب بالفيروس، ولو كانت مناعتك قوية وممرضتش ممكن تنقل الفيروس لحد من حبايبك، لازم نبطل نسلم بالإيدين أو نبوس ونحضن بعض، ولو حصل غصب عنك الكحول والصابون هم اللي بيطهروا الإيدين حسب منظمة الصحة العالمية.
مضيفًا، أمشي طول الوقت بزجاجة كحول وماسك في جيبك وأي شيء تلمسه سواء كان باب ـو زرار او فلوس او اي سطح معدني بتلمسه، أي شيء خارج حدود جسمك طلع ازازة الكحول واغسل إيديك بيها فورًا، ولو مفيش كحول اتعامل مع أيدك على انها مصدر عدوى لغاية لما تغسلها بالمية والصابون.
وحافظ على مسافة متر على الاقل بينك وبين أي حد ولو انت مضطر انك تقرب اكتر زي في الشغل مثلا أو في مكان زحمة أو في المواصلات العامة ألبس ماسك ومتستهونش بالوقاية لانك ببساطة ممكن تنقل العدوى لأب أو أم كبار في السن وقاعدين في البيت.
واختتم بقوله، اتعامل مع كل شيء حولك على أنه مصدر عدوى ليك وأتعامل مع جسمك على انه مصدر عدوى للي حواليك، علم ولادك ازاي يعملوا ده، وعلم أقاربك وأحبابك وأصحابك وانشر الدعوى دي في كل مكان تعرفه، مدام مفيش علاج.. الوقاية هي العلاج.
