كتبت – أماني موسى
قال المطرب تامر حسني، تعقيبًا على الإجراءات الوقائية التي نصحت بها منظمة الصحة العالمية لتجنب الإصابة بفيروس كورونا، أنا شوفت موقف قدامي صدمني مش قادر محكيهوش، شوفت واحد بيقول لصاحبه: ( ياد شيل الماسك ياد و إسترجل ).
وعلق قائلاً: طب هو عشان في وجهة نظر حضرتك يسترجل فيكون سبب في موته وموتك وضرر كل من حوله؟ معقول كل دول العالم المتطوره مؤمنة بالوقاية دي و إحنا بقى اللي عندنا الفهلوه والمفهوميه كلها اللي بيتريقوا على الوقايه دي؟
وتابع في تدوينة عبر حسابه بالفيسبوك، أكيد مسكتلوش وفهمته على قد ما أقدر و فهمته يا سيدي لو حتى انت من الناس اللي بتقول دا وهم مش هتخسر حاجة لما تاخد كوكب الأرض بالكامل على قد عقله وتحافظ على نفسك الكام يوم دوول بس المشكله إن في منه كتير بيفكروا زيه.
مستطردًا، عشان كدا كلنا لازم نتكلم كتير مع كل الناس عشان نوعي أي حد مش حاسس بالخطوره لازم نلتزم و نقعد في البيت ١٤ يوم يا ناس عشان نسيطر على إنتشاره و ميتحولش لوباء الصين إنتصروا على الوباء لما إلتزموا و منزلوش الشوارع نهائي.. ولو في ناس شغاله بيوميات لازم توصلهم يومياتهم لحد عندهم من باب الرحمه عشان ربنا يرحمنا.
يا جماعه دا إن شاء الله إختبار من ربنا وهننجح فيه لو اتعاملنا معاه صح و بمنتهى الرحمة، والتعب وارد يحصل لأي حد فينا وهيخف إن شاء الله زي ما آلاف خفوا، وخفوا من أمراض أكتر من كدا بمليون مره و دا مش أول وباء عالمي يمر علي البشر و غيرنا مر بأكتر منه، دي فرصه للي مقصر في حق ربنا إنه يقرب منه تاني.
