كتب – محرر الاقباط متحدون ر.ص
طالبت السيناريست والكاتبة مريم ناعوم، بوقف تصوير جميع مسلسلات رمضان للحد من انتشار فيروس كورونا المستجد، مع دفع أجور العاملين في هذه المسلسلات، بما فيها مسلسلها الجديد.

وكتبت "ناعوم"، عبر حسابها الرسمي على موقع "فيسبوك"، :" عارفة إن اللي هقوله ده هيزعل ناس كتير، ومنهم فريق عمل مسلسلنا لرمضان... بس اللهم قد بلغت، كل التصوير لازم يقف ١٥ يوم (مع دفع جزء من الأجر للعمال."

وتابعت :" نوقف لغاية أول أسبوع في ابريل،يعني هيبقى فاضل أسبوعين تصوير على بداية رمضان.. و٣ أسابيع تصوير داخل رمضان...أعتقد المسلسلات كلها ممكن تتقفل ١٥ حلقة خلال الـ ٥ أسابيع تصوير دول."

مضيفة :" الناس اللي بدأت بدري تقفل أول ١٥ حلقة وتعرض النص الأول من رمضان.. وتكمل تصوير عادي عشان الدنيا ماتفرطش منهم وال ١٥ حلقة التانيين يتعرضوا ما بين العيدين، والناس اللي بدأت متأخر تعرض النص الثاني من رمضان.. وبرضه تكمل تصوير وتعرض بعد رمضان برضه."

وواصلت :" ده معناه إن التصوير يقف أسبوع العيد بس ونكمل تصوير عادي عشان نقلل الضرر على جهات الإنتاج لان في ديكورات مبنية وتفاصيل لوچيستية كتيرة جدا بتزود الخسارة لو الوقفة طويلة... وفي نفس الوقت كل المسلسلات يتعرض منها ١٥ حلقة.. فمحدش يتضر ضرر كامل، ونحمي الكرو والفنانين والفنيين والعمال لإن لو حد لا قدر الله عيي في أي مسلسل ده بيهدد المسلسل إنه يتوقف تماماً."

موضحة :" لو المنتجين اجتمعوا بالقنوات وكل مسلسل قال هو مصور قد ايه وفاضل له قد ايه عشان يقفل ١٥ حلقة أكيد هيقدروا يتوصلوا لخريطة عرض منطقية تحافظ على شغل الجميع لأن هنا المصلحة العامة أصبحت مصلحة خاصة."

ولفتت :" شخصياً أقدر أعزل نفسي لأني ممكن أشتغل من البيت.. لكن في أفراد صناعة كاملة مطلوب منهم ينزلوا يصوروا كل يوم وسط أعداد كبيرة جداً ومجاميع وأماكن محدش عارف مدى نظافتها، أرجوكم نختار معاركنا.. نتحكم في حجم خسارتنا بإيدينا بدل ما الخسارة هي اللي تتحكم فينا."