كتبت – أماني موسى
أثار فيديو لفتاة مصرية تسخر من السائحين وتدعو عليهم بالهلاك، غضب رواد مواقع التواصل الاجتماعي، حيث تداول نشطاء فيديو لفتاة تدعى ريهام خالد وهي تدعو على السائحين باللغة العربية وهم يبتسمون ولا يعرفون ترجمة ما تقوله وهي تبتسم في وجوههم.
وقال أحدهم: حقارة وسماجة.. بنت إسمها (ريهام خالد) .. تقريبًا من نوعية البنات اللي هما لا عارفين حقوقهم ولا شيء، المهم .. البنت نزلت فيديو مدته 14 ثانية مع إثنين من السياح الأجانب ودار في الفيديو اللي هقولكم عنه ده وبأختصار : البنت قالت نصًا: أنتم ليه جايين تتفسحوا .. أنتم خلاص يومين والقبر. اعملوا لآخرتكم. رغم أن السياح مش فاهمين ولا كلمة. في مشهد مقرف ويدل على إن البنت لا هي عندها أخلاق ولا إنسانية ..... رغم أن السياح قابلوا البنت بشكل لطيف جدًا.
وقال آخر، لازم أهالي الكائنات اللي زي دي. يتعاقبوا أشد عقاب ؛ لأن هما مربوش أولادهم تربية فيه أخلاق. ولا حتى عرفوا يفهموا أولادهم إزاي يستخدموا "الموبايل". ومش بعيد يكون أهلهم زيهم كده. البنت تقريباً عندها 17 سنة .. يعني أعتقد إن هي راشدة كفاية لفعل وقح زي ده ! قولت في نفسي يمكن يا أحمد البنت بتهزر. بس لقيت عشرات الفيديوهات اللي البنت بتنزلهم مع سياح بنفس الطريقة !
وتابع، قمة الحقارة اللي في الدنيا لما ناس تكون ضيوف في بلدنا ونروح نستظرف ونمارس الحقارة عليهم .... بطريقة كلام هما مش فاهمينها عشان شوية مشاهدات أو اياً كان هدف البنت من اللي بتعمله ده .. المفروض يكون في حساب لأن الفيديو فيه حقارة وسماجة مش طبيعية .... ولو شوفتي البوست يا ريهام. عايز أقولك إنك (لا عندك وعي ولا دم خفيف). ولازم تعتذري فوراً من اللي بتعمليه ده .
وأختتم، لحسن حظ البنت إن السياح مش بيفهموا مصري. وإلا كانوا عملوا معاها الصح والله. بس مش مشكلة. أحنا آسفين. فعل حقير لا يعُبر عن شعب مصري حُر.
