كتب – نعيم يوسف
شن الباحث والمفكر، إسلام بحيري، هجومًا شديدًا على الشامتين في الغرب في أزمة فيروس كورونا، لافتًا إلى أنهم يمتلئون بـ"النقص والانهزام".
وقال "بحيري"، عبر حسابه على موقع التواصل الاجتماعي "فيسبوك": "من أول أزمة كورونا مكتبتش ولا كلمة على أي اتجاه أو تحليل لكن قررت أبدأ بأكثرهم كرها إلى قلبي"، مضيفا: "هما جماعة الشامتين في الغرب بالعموم من نوعية الكلام عن انهيار أوروبا وضياع أمريكا وفشل الرأسمالية وتفكك الاتحاد الأوروبي والحلوين دول المليئين بعقد النقص والانهزام أحب أقولهم الحقيقة الصادمة".
وتابع الباحث والمفكر: "الحقيقة إن الدول العظيمة اللي انتم شمتانين فيها دي هي اللي قادت العالم للتطور والتحضر والرقي والنهضة في كل شيء في الخمس قرون الأخيرة من إيطاليا اللي علمت حضرتك إزاي تلبس وتتشيك وعلمتك تعمل ديكور بيتك وتنسق ألوانه وأخدت بإيدك للأوبرا والسينما والبهجة في الحياة -حتى لو انت مش بتلبس إيطالي عمرك فعلى الأقل بتلبس تقليده- إلى فرنسا اللي علمتك الحريات والقانون والإتيكيت والجمال والانتيك ولبستك البدلة بشكلها الحديث وربطة العنق اللي فرحان بيها وانت رايح انترفيو الشغل وعلمتك تخلي الدنيا ريحتها حلوة وعلمتك الثقافة بمفكريها وأدبائها وعلمتك التحضر وإنك لما تقابل امرأة توطي تبوس إيديها لأمريكا لألمانيا لأسبانيا مش هحكي ومتعدش الجمال والرقي والتقدم والتطور".
وأضاف: "أما الرأسمالية التي سقطت فأحب أقولك وأفكرك إن الرأسمالية دي هي اللي انت قاعد متنطع على الكنبة ومنتظر من شركاتها العظيمة إنها تنتج ليك ال ( vaccine ) اللقاح عشان تنزل تاني تتبسط والرأسمالية اللي تعباك هي وشركاتها الجبارة المتقدمة اللي مخلياك ماسك التليفون الاسمارت أو اللاب توب وفاتح منه فيس بوك وتويتر " الرأسماليين " وموصلهم بالانترنت " الرأسمالي " عشان تقعد تنظر وتفتي إن نظام الرأسمالية لابد أن يسقط بعد كورونا، والرأسمالية والدول العظمى في الغرب هي مخلياك بني آدم بتلبس وتتعالج وتستخدم التكونولوجيا وتسافر بطيارات وتركب عربيات وتلبس حلو وتتفرج على التلفزيون وتبعت للمدام أو لصاحبتك على الواتس آب".
واستطرد: "ولو الرأسمالية سقطت وده مستبعد تماما فأنت أول واحد هترجع لقيط من بقايا العصر الحجري بتموت في سن ال ٢٥.. آه نسيت أقولك في الآخر يا عزيزي الخبير التنظيري إن الدولة اللي " مش " رأسمالية هي اللي دمرتك التدمير ده وبسبب الكذب والخداع في أول مرحلة الفيروس خرج برا السيطرة وبدأ مرحلة الوباء"، مضيفا: "فيا عزيزي stay على الكنبة لحد ما يخترعوا ليك المصل اللي هتجري تتتجرعه عشان تعمل مشوارك المهم اللي انت محروم منه وتزور خالتك عفاف".
