كتب – محرر الاقباط متحدون ر.ص
قال الدكتور نبيل القط، استشاري الطب النفسي :" مش فارق معايا إذا كان فيروس كورونا عملته أمريكا أو عملته الصين ولا فارق معايا مين هيكسب من الفيروس الرأسماليين الكبار ولا الشركات الصغيرة وإذا كان الاتحاد الأوروبي هيستمر ولا يتفكك."
وتابع "القط"، عبر حسابه على موقع التواصل الاجتماعي "فيسبوك"،:" الحقيقة اللي فارق معايا أن أبويا اللي عنده ٨٥ سنة ميتبهدلش في أخر حياته وفارق معايا أن صاحبي اللي عدى الستين ومركب دعامتين في القلب ميتصابش وفارق معايا أصحابي اللي اغلبهم فوق الخمسين ومدخنين لان اغلبهم مش هيلاقي العناية الكافية في بلد زي بلدنا، وخايف أموت في الأخر مخنوق عشان مفيش أجهزة تنفس صناعي كفاية، وفارق معايا الوحيدين اللي ملهمش حد يونس خوفهم في الحظر والنَّاس اللي فقدت أو هتفقد أعمالها."
مضيفا :" فارق معايا اللي انقطعت بهم السبل عن الوصول لعائلاتهم وأحبابهم لسبب قطع الطيران والحوامل اللي مرعوبين تجيلهم الولادة في ساعات الحظر و المرضى اللي مش لاقيين دواهم بسبب قطع الطيران واللي بيكافحوا يوميا عشان يجيبوا لقمة العيش من فم الفيروس في الباصات الزحمة والمترو والشوارع."
واختتم :" فارق معايا الستات اللي مرعوبة على أجوازها وأولادها أما بقى مجلس إدارة العالم فنسيبه للفيروس ياخد اجله."
