مايكل عزيز
+ ازاى بنرفض المادة الثانية بالدستور والخاصة بالمسلمين وازاي بنتمسك بالمادة الثالثة الخاصة بالمسيحيين ؟!
+ ازاي بننتقد مشايخ المسلمين وبنسخر من تطرفهم ، وبنفس الوقت بنرفض اي نقد موجه ضد رجال الدين عندنا ؟!
+ ازاي ندين قمع المرأة فى الإسلام والتحقير من شأنها ، وإزاي الكثير منا يؤمن بنجاسة المرأة فى المسيحية وعدم السماح لها بالتناول أثناء فترة الحيض بل ومنع دخولها الهيكل وخورس الشمامسة للصلاة ؟! .
+إزاى بنسخر من قصة الإسراء والمعراج عند المسلمين وبنسخر من خرافاتهم ، وإزاي بنزعل لما حد يشكك فى ظهورات العدرا ومعجزات الزيت ونبش جثث القديسين وغيره .
+ إزاى المتدينين بتوعنا رافضين مبدأ الطلاق وحل مشاكل متضرري الاحوال الشخصية الهاربين إلى الاسلام ، وازاي نفس هؤلاء القديسين رافضين مبدأ تساوي المرأة فى الميراث مع الرجل ، مفضلين تطبيق الشريعة الإسلامية فى هذا الشأن؟!
+ ازاي بنشجب وندين العنصرية الدينية الواقعة بحق الاقباط واحنا كل يوم بنلعن الطوائف المسيحية الاخري وبنهين معتقداتهم ؟! .
ده ملخص بسيط لبعض المتناقضات داخل مجتمعنا القبطى المسيحى ، والسؤال المطروح الآن : إحنا ازاي بقينا كدة ؟
