كتب – ايهاب رشدى 
قالت الدكتورة مني مينا، عضو مجلس نقابة الأطباء السابق ، أنها تدعم الحظر الشامل من أواخر رمضان وحتى نهاية العيد .
 
وأضافت  " مينا " خلال صفحتها على موقع الفيس بوك ، أن مقترح الحظر الشامل هو أخر فرصة نقدر نلم بها الموقف – حسب قولها  -  وذلك لعدة أسباب أوضحتها من وجهة نظرها فى النقاط التالية :
 
-  معدل الاصابات كما نراه حولنا في ارتفاع .. برغم ان "الصعوبة الشديدة" في عمل المسحات و التحليل تبع البرتكولات المستحدثة لوزارة الصحة بيصعب جدا تسجيل الاصابات .
 
-  المستشفيات و الأطفم الطبية مش ملاحقة و مش مستوعبة .. و لو ما حاولناش نوقف التزايد اللي الحاصل الوضع ها يبقى أخطر بكتير .. غالبا دي أخر فرصة نقدر نلم الدنيا ..
 
-  الفترة دي فترة اجازات ..يعني قطاع العاملين اللي بيشتغلوا باليومية بيكونوا أجازة طبيعي .. و ده معناه إن الفترة دي فرصة لإنها ستسبب أقل إيذاء للقطاعات الأكثر هشاشة و الأقل قدرة على تحمل "منع العمل "
 
-  العادات الاجتماعية المعروفة قبل العيد و أثناء العيد ، من شراء الكثير من المستلزمات و السفر للأهل (خصوصا أهل القاهرة اللي بيروحوا لأهاليهم في الأرياف) و زيارات المعايدات .. كل ده سيعطي فرصة عالية جدا لإنتشار الفيروس .. و الأخطر سيساعد على وصول الفيروس من القاهرة ا للمحافظات التي ماتزال الاصابات بها بسيطة
 
-  للأسف تم بالفعل فتح المولات و الفنادق للسياحة الداخلية .. يعني نتوقع في أيام العيد ازدحام في المولات (اماكن مغلقة بتكيف مركزي) .. و ناس في الفنادق .. و حمامات السباحة .. 
 
-  الكلام على ضرورة دعم قطاع السياحة كلنا بنؤيده .. و عشان كده تم تخصيص 50 مليار جنيه لدعم هذا القطاع .. لكن مش ممكن يكون دعمه بإننا نسمح بالمصايف و الحجز في الفنادق حاليا بينما معدل الإصابات في تزايد مستمر ..كده نبقى بننتحر مش بندعم قطاع السياحة .. عموما ممكن التعاقد بأسعار مخفضة مع الفنادق للعمل كمعازل غير علاجية لحالات كورونا المؤكدة التي لا تعاني من أعراض ..و بكده نشغل الفنادق في المساعدة في محاصرة العدوى.. و لا نسمح بتشغيلها بشكل ينشر العدوى ..
 
-  لا يصح أن يتم فتح المولات و الفنادق و المحال التجارية غير الضرورية و تقليص ساعات الحظر و نتكلم بعد كده إننا بنراهن على "وعي المواطن" أو " الناس هم اللي غلطانين" .. لأن الاجراءات دي نفسها بتعطي للمواطن انطباع شديد بالإسترخاء .. و عموما لو كان المواطن مش ملتزم بدرجة كافية يصبح من الضروري وضع قواعد صارمة تمنع ان الوضع يتدهور و الكارثة تعم على الجميع .