محمد علام

* ايه هى الاعراض ؟؟
كتتير جدا اتكلمنا فيها هما ٣ اعراض اساسية (ارتفاع درجة الحرارة - سعال جاف - الم بالجسم ) ثم بعد ذلك ضيق بالتنفس
فى اعراض تانيه بتظهر فى نسبه بتصل ل ٥٪ لكن مبتظهرش لوحدها (رشح بالانف - احتقان بالحلق - اسهال والم بالمعده - سعال ببلغم بدل جاف - صداع - فقدان حاسه بالشم والتذوق )
بكرر مبيجوش لوحدهم لازم عرض من الكبار ولو لوحدهم فرشح الانف والسعال اعراض برد اكتر منها كوفيد

* الاعراض كلها بتظهر مره واحده ولا لا وقد ايه فتره الحضانه ؟؟
فتره الحضانه من يوم ل ١٤ يوم لكن فى المتوسط ٣ ل ٧ ايام .
مش كل الاعراض بتظهر . اساسا ممكن مفيش اعراض تظهر خالص ومتعرفش وممكن يظهر عرض واحد زى ارتفاع درجه الحراره يوم او اتنين مع شويه الم فى الجسم والموضوع ينتهى وممكن اكتر من عرض بتختلف من شخص للتانى .

* الواحد بيخف بعد قد ايه ؟؟ والوفاه بتحصل بعد قد ايه ؟؟
بدون اعراض اسبوعين
اعراض بسيطه ٣ اسابيع تقريبا
حاله حرجه من ٤ ل ٦ اسابيع
الوفاه نسبه قليله ومفروض مكنش داخل على المرض ومستنى الوفاه لكن بتحصل بعد ٣ اسابيع من الاصابه تقريبا

* هل الوفاه ممكن تحصل فجأه ؟؟
الوفاه لمصاب الكوفيد بتحصل بعد مرور بتسلسل معين
من الاصابه لظهور الاعراض متوسط ٥ ايام وبتبدء اعراض خفيفه ثم تزيد علشان يدخل فى ضيق تنفس والتهاب رئوي تقريبا اسبوع وعلشان الحاله تسوء بردوا محتاجه من ٣ ايام لاسبوع هنا ممكن تحصل الوفاه يعنى من اسبوعين ل ٣ من ظهور الاعراض

* امتا اروح اكشف ؟؟ او ظهرتلى الاعراض مفروض اعمل ايه؟؟
ده اهم سؤال ظهرت اعراض وانت بتخرج للشغل وبتختلط مع الناس يبقى لازم تكلم ١٠٥ او تروح الحميات او الصدر نطمن يعنى مفيش حد يكون تعبان بقاله اسبوعين ولسه رايح يفكر يروح يكشف لما حالته بقت سيئه من بدايه ظهور الاعراض اروح وهما هيوجهونى صح او اكلم ١٠٥
ونصيحه اول متشك وتظهر اعراض البس كمامه اجبارى وابعد عن اهلك لحد لما تطمن انت لو شاب الموضوع هيمر عليك ببساطه لكن الناس الكبار هيبقى اصعب

* نسبه ان لما يجيلى كوفيد يكون فى مضاعفات قد ايه ؟؟
الارقام بتتغير كل يوم لكن للاحسن على فكره يعنى ايه الكلام ده !!
اول الصين مطلعت ارقام على عدد حالات ٧٢ الف وقالت ٨٠٪ اعراض بسيطه و ٢٠ ٪ فقط هيدخلوا فى مضاعفات و٥٪ بس اللى هيكملوا لحالات حرجه
لكن بعد كده ظهر ان فى حالات بدون اعراض ملهمش احصائيه مش هعرف عددهم كلهم
يعنى بعد انتهاء الوباء احتمال نسبه الوفيات نلاقيها اقل من ١٪ عادى جدا او ازيد الله اعلم فمش هتكلم فى ارقام فى الحته دى لانها كلها اجتهادات شخصيه علشان محدش عارف العدد الكامل

ببساطه دلوقت عندنا حالات بدون اعراض هيخفوا بدون اى تدخل وغالبا مش هيعرفوا غير بالصدفه انهم مصابيين .
وحالات باعراض منهم ٨٠٪ حالات بسيطه لا تتعدى دور البرد وفقط ٢٠٪ محتاجين مستشفى ودول اللى لازم الحقهم بدرى ومنهم ٥٪ الحالات الحرجه اللى هيبقى فيهم الوفيات

* نسبه الوفيات قد ايه وليه عندنا كبييره ؟؟
ده سؤال مهم نسبه الوفيات فى دول لا تتعدى ١٪ وفى دول ١٢٪
ليه الاختلاف ده ببساطه وبدون تعقيد عندنا ٤ عوامل بيتحكموا فى نسبه الوفيات
١- عدد المسحات وهل بعتمد على بروتوكول عمل مسحه للشخص اللى عليه اعراض ولا لكل المخالطين (دول العالم كلها معتمده على الشخص اللى عليه اعراض ايطاليا المانيا اسبانيا كلهم علشان كده نسبه الوفيات عاليه ماعدا بعض الدول زى السعوديه معتمده على مسح لكل المخالطين ) توضيح منظمة الصحة العالمية معتمده على عنل مسحه للشخص اللى بيظهر عليه اعراض .
٢- متوسط عمر المواطنين كل لما يزيد عدد الناس الكبار بمشاكل صحيه بيكون الوفيات اكتر
٣- اهم سبب من رايي واقلهم تكلفه وافضلهم تاثير تطبيق التباعد المجتمعى صح يعنى انا عارف ان الخطوره على كبار السن وأصحاب الأمراض المزمنه لو امنتهم ومنزلوش واتعاملت معاهم بحذر وامنت نفسي وانا خارج وداخل عليهم مش هيحصلهم حاجه فمش هيحصل وفيات كتيير وهلاقى النسبه لا تذكر.

٤- قدرة المنظومه الصحيه فى البلد لو عدد الحالات بقى ازيد من طاقتها الاستيعابيه هنا هتحصل وفيات اكتر من الطبيعى

نصيحه اخيره ومهمه (ليه مفروض اهتم والتزم ولو ظهر اعراض مطنش علشان انا الموضوع عندى ممكن يعدى ببساطه لكن هفضل اعدى وهعدى اهلى واصحابى وللاسف هيموت حد بسببى فاول ميظهر اعراض حتى لو برد امان البس كمامه وابعد عن الناس اللى اخاف عليهم