كتب – محرر الاقباط متحدون ر.ص
قال الناشط الحقوفي "محمد السماك"، ان اللاعب المصري "شيكابالا" يعتبر من اكتر الناس إلي بتتعرض للتنمر بسبب بشرته السوداء بل أن الحقارة وصلت أنهم بيشككوا في نسب ابنه بسبب لأنه أبيض والحقارة دي في كل صوره بتجمعهم."
وتابع عبر حسابه على "فيسبوك"، من يومين شيكابالا نزل صورة مع ابنه ومراته وبسبب التعليقات الزبالة من ناس فاكره أن التريقة والتنمر خفة دم وبتفتخر بده حط ايموشن علي وش ابنه علشان يتحاشى كرباج كلامهم وتخلفهم، وبرضو كانت كميه رهيبة من الوساخة في التعليقات عبارة عن تنمر علي لونه وشكله ولون ابنه ولبس مراته وحجابها وطالما وصلنا لمراته يجي دور شعبنا المتدين بطبعه واللجان الالكترونية إلي بتجاهد في سبيل الله بالتنمر والسخرية."
مضيفا :" هتقولي إيه علاقة تدين الشعب بناس معدومة الأدب والأخلاق؟ هقولك أن التدين المزيف بتاعهم هو نفسه الي بيخليهم يبرروا الاغتصاب بحجة أن المرأه عورة وخروجها من البيت حرام ولبسها بحريه يعتبر عرض نفسها علي الرجال لاغتصابها زي ما قال الشعراوي أو استفزاز ذكوريه الرجال زي ما قال عبدالله رشدي."
واختتم :" كل إلي تنمر علي شيكابالا بسبب سواد لونه لازم يتعالج من سواد قلبه كل إلي تنمر علي شيكابالا بسبب لون ابنه بحجة الاستظراف وخفة الدم لازم يدخل مصحة نفسيه كل إلي استباح التنمر والتسخيف علي زوجته بحجة أنها تستاهل عشان لبسها هو مشروع إرهابي لأن الي استباح جرح مشاعر الأخريين بحجة أنهم مش ملتزمين بكره يستبيح دمائهم بحجة أنهم مش مسلمين."
