وفي ألف ديك بيصيح
عليا وأنا نايم
بيقولي جنبه جريح
وحبه ليك دايم
***
وأنا في الحياه سكران
تملالي في كاساتها
أشرب وأكون حيران
في كلامها وسكاتها
***
تملالي كاس المال
أسكر وأقول تاني
وأنسي إني ببيعك
وبشيلك أحمال
وتشيلها علشاني
وتقولي أنا حبيبك
***
وإدتني كاس الذات
وقالتلي كون مشهور
قولت أنا مستني
متهمش السموات
ورميتك أنت النور
فلقيتها.. بتهيني
***
وإزاي يا رب أنت
صابر على خيانتي
واسمك القدوس
تقول لذتي أنت
وإيديك تداوي حالتي
وأنا على الحنان ده بدوس
***
وبحربتي طعنتك
وجلدتي استحملت
ملكك في إكليل شوك
وتقولي لو خانتك
الدنيا ولا ضعفت
تعالى حضن أبوك
***
وأقول يا بطرس "إخص"
إزاي نكرت يسوع
قدام جواري وعبيد
وأنا قلبي متغيرش
بيبيتك موجوع
حتى في يوم العيد
***
وأصرخ.. يهوذا خاين
ملعون.. باع السيد
ومن الفضة خد تلاتين
وأنا قلبي ليك هاين
وحبك بيتقيد
وبخون وتبقى أمين
***
وتوما.. تشك إزاي
في الحربة والمسامير
وفي جنبه تحط إيديك
وأنا شكيت إنك جاي
بغلط وأشيل العار
وأنسى إن شايفه عينيك
***
لاجئ أنا لجنبك
ياربي يا مصلوب
يغسلني ويطهر
حكمي أنا لحبك
ياما مسحت ذنوب
توبني فأتغير
***
احسبني زي اللص
أو حتى كالملايين
سمعوا بفرح صوتك
عيني عليك بتبص
مليانة شوق وحنين
طمعان في ملكوتك
***
يا يسوع يا أطيب أب
دوقني من طيبتك
كملني بكمالك
عارف إن كلك حب
ولا عمري راح أفارقك
يكفيني إحسانك

كن في قلب الحدث... انقر هنا لتحميل شريط الأدوات الخاص بالموقع لتصلك الأخبار لحظة حدوثها

تابعونا على صفحتنا علي الفيسبوك
رابط دائم :