مرقس كمال
لما حد يبقى عقله صغير وانت عقلك كبير
بيقولولك متعملش عقلك بعقلهم
في الحب نفس الكلام لما ربنا يديلك قلب كبير ويملاه حب من عنده ويخليك ماشى بتكب وتفيض حب على الكل بدون شروط ويخليك قادر تحتوى وتسند وتداوى وتطبطب على قلوب موجوعة
ووسط كل ده تقابل ناس بتحب بالعافية
متعملش قلبك بقلبهم
اتعامل بفيض حبك وغرق الكل ومتستناش رد ولا تستنى حتى شكر
خلى حبك يغيّر
خلى حبك يبقى النهر اللى بيغسل ويزيح هموم اتراكمت
خلى حبك بذرة ترميها فى قلوبهم وتمشى
وخليك واثق ان ربنا هيرويها وينميها
وفى يوم هتطرح وتجيب ثمر حتى لو انت مش موجود ومش شايف ده
وحتى لما يعدى عليك وقت تضعف وتتعب وتخور وتحس انك مستهلك وطاقتك خلصت وتتهاجم بأفكار حسرة وندم وضيق
ارمي نفسك عند المسيح عشان يجدد طاقتك ويقومك من جديد
واوعاك تندم على حب قدمته واخدت قدامه اهانه او تعيير او نكران
اوعاك تقول ميستاهلوش
واوعاك تبص وراك بحسرة وتقول ياريتنى ما قدمت
أفرح انك قدرت تقدم حب
أفرح انك زى ابوك المسيح اللى قدم حب حتى للى صلبوه
أفرح انك شبهه وعلى صورته وبتعمل مشيئته
واطلب منه يجدد ويزود طاقة حبك ويخليك دايما قادر تحب
واطلب منه يوجهك ويديلك حكمة تقدم الحب اللى اتجدد امتى وفين ولمين وازاى
وبرضو يا صاحبى متعملش قلبك بقلبهم
