كتبت - أماني موسى
أعرب الفنان يحيى الفخراني عن حزنه الشديد لرحيل الفنانة رجاء الجداوي، قائلاً: أن علاقتهما لم تنقطع منذ آخر عمل جمعهما وهو مسلسل "للعدالة وجوه كثيرة، وكانت دائمًا تتصل للاطمئنان عليه وعلى أسرته.
وأضاف الفخراني، في مداخلة هاتفية لبرنامج "الحكاية" على قناة "mbc مصر" مع الإعلامي عمرو أديب، أن علاقته بمواقع التواصل الاجتماعي ليست قوية، ولكنه سمع بالهجوم والتنمر على الفنانة الراحلة بسبب علاجها على نفقة الدولة، قائلاً: "الحقيقة أنا اتقهرت، لأن مش دي بالذات، متجيش في دي، اللي يعرفها قريب يعرف إنها مش بعيدة، دي أم وأخت".
تابع الفخراني: "عمري ما كنت أتخيل إن في حد يتنمر على فنان بيحبه، كنت فاهم كده إنه مستحيل، أنا بعيش جواك وبدخل بيتك فإزاي تقول عني كده، وساعتها قولت للميس وشادي لو عييت وهتكلف ملايين مش عندي إوعوا تاخدوا من الدولة حاجة، وأنا الحمد لله ميسور وأقدر لكن في فنان تاني هيقول لأ".
وأردف: "انهاردة كمية المكالمات اللي جاتلي تعزيني في رجاء الجداوي من قرايبي أو من نمر ما اعرفهاش ده اللي صلح عندي وحسسني إن الدنيا بخير، ورجاء واصلة عند الناس وبيحبوها زي الأم والأخت والجدة".
وأختتم بقوله، كلنا رايحين بس بقى السيرة الطيبة لرجاء الجداوي الله يرحمها ويحسن إليها ويجعل مثواها الجنة.. وهي باقية وموجودة بأعمالها وفنها.
وقال أديب للفخراني: "أرجوك لا تفقد ثقتك بالناس اللي بتحبكم وتقدركم، اللي تنمروا دول ناس مريضة، اللي تنمر برجاء واستكتر عليها سرير في مستشفى دي ناس مريضة، متقلقش الناس بتحبكم وبتقدركم".
