كتب - نعيم يوسف
روجت المجتمعات الشرقية لنفسها على مدار تاريخها بأنها تعتبر المرأة "شرف" الرجل، وأنه لا يوجد رجل يقبل المساس بـ"شرفه" أو إهانته، إلا أنه في الأيام الأخيرة شهد المجتمع واقعة غريبة حيث قرر زوج عرض شرفه على العامة، نظرا لخلاف وقع بينه وبين زوجته.
تهديد ووعيد
"هي عارفة والله إني معايا صور كتير ليها بقمصان النوم وهي اللي كانت بتصور نفسها مش أنا اللي بصورها وحاليا الصور بتطبع وهيتم توزيعه في شارعهم القديم وفي مقر شغلها".. هذا نص إحدى الرسائل المنسوبة للزوج، المدعو "أحمد. س. ع"، والتي نشرتها الزوجة التي غُدر بها وتدعى "هدير حامد".
أصل القصة
تروي هدير، في مقطع فيديو منشور لها عبر الإنترنت قصتها وتقول: "أنا عندي 25 سنة خريجة كلية الآثار، جامعة القاهرة، اتخطبنا 7 شهور، ودخلوا علينا كعيلة كبيرة، ومتربي كويس، وشغال ومعتمد على نفسه، وهو اللي عمل نفسه، وعنده شغل مستقر".
وتابعت: "اكتشفت إن كل ده كدب، والشغل كان فترة لمدة 7 شهور، وهو مش بيتحمل مسئولية، وقعد 7 شهور في لابيت بعد الجواز من غير شغل.. بدأت المشاكل في الظهور، ولما كنت بقوله عايزة بامبرز للبنت يقولي ممعاييش.. وعندما طلبت الطلاق طلب مني التنازل بشكل رسمي عن البنت.. وبعت كل الصور بتاعتي للأصدقاء عندي على فيسبوك وبعتها لأجواز صحابي، وبعت صورتي وأنا في أوضة النوم.. وبعت نفس الصورة لبابا ولأخويا ولعمي.. وقالولي ده مش راجل ومستحيل تكوني على ذمته".
وأضافت: "أنا أمنتك على نفسي، وقاعدة في بيتي.. إزاي أخلي بالي من جوزي!! أنا عايزة حقي وحق بنتي ورد اعتباري".
رسائل تهديد
ونشرت "هدير" عبر حسابها على موقع التواصل الاجتماعي "فيسبوك"، بعض الرسائل التي يهددها فيها ويقول: "ولو فاكرة إني خلاص كدة مش هبعت صور تاني أو هعمل حاجة تاني قوليلها لا.. ده لسة بدري دي البداية بس"، وأيضا رسالة تقول: "وعايزك تعرفيها إني بعت صور ليها تطبع وهبعت أوزعها في مكان شغلها"، وأيضا: "انتظروا كل يوم صورة بقميص نوم شكل".
تعاطف كبير مع الضحية
وعلقت "هدير" على ما حدث، وقالت: "الموضوع لما يبقي في شرف وعرض بيبقي محتاج راجل وللاسف عايزين تضيعوا حقي بكلمتين وتقولوا معلش واسفين ..لا كلام ده عندكوا انتوا يخلص بالكلمتين دول.. وربنا حقي هيجيلي لحد عندي الموضوع كبير والناس كلها معايا اوي علشان رجاله انا بس لما انا لسه علي ذمته ولسه بحمل اسمه ومحسوب عليا راجل وهو ربنا ينتقم منه متخيله القرف ده ومصدومه الواحد يثق في مين لما اجي اقعد في بيتي ابقي اخلي بالي بقي طب ده يرضي مين".
ووجدت هدير تعاطفا كبيرا من المتابعين، وأعلنت الإعلامية رضوى الشربيني عن دعمها لها، وقالت: "وعندنا هنا واحد بينشر صور مراته بملابس البيت اللي أنتم طبعا فهمين شكلها إزاي على كل الجروبات علشان مرضيتش توافق تتنازل على حقوقها عند الطلاق.. ده أنت هتزعل وهتجيب ناس تزعل وعليهم ناس تزعل عليكم كلكم".
