كتب – محرر الاقباط متحدون ر.ص
قال الناشط الحقوقي محمد السماك، ان التنمر والعنصرية مش بتمارسه جماعه معينة أو حكر علي فكر معين لكن هو مرض للأسف موجود بكل مكان لكن لما يبقي المرض مقنن يبقي هو ده القبح بعينة.
ونشر عبر حسابه على "فيسبوك" صورة لفتاة وعلق عليها :" البنت الجميلة دي اسمها (Merna Elwosseif) من أهل لافيستا كاسكادا الساحل الشمالي حبت تنزل البيسين عادي ولأنها محجبة فنزلت بالبوركيني لكن واحد من الملاك معجبهوش شكلها بالبوركيني وطلب من أمن البيسين انه يطلعها ولما قررت تشتكي للإدارة قالها دي القواعد وان القوانين اللي وقع عليها الشركة والملاك بعدم تواجد محجبين بالبسين.
وتابع :" في الحادثة دي هي اخترقت القانون لكن تعالوا نتكلم بشكل موضوعي عن القانون ده ذات نفسه إلي هي اخترقته يعني إيه بلد دستورها إسلامي والمشايخ والمؤسسات الدينية بالدولة 24 ساعة كلام عن فرضيه الحجاب وعقوبة خلعه والمحجبات فيها ملهمش حق يستمتعوا في بلدهم يعني بعد ما حجبوا البنات كلها بقو يعاملوهم معاملة درجة تالته وللي لابسة بكيني بس هي اللي لها احترام و محدش يقدر يكلمها، ونقلا عن احد الأصدقاء "سافرنا و لفينا بلاد كتير و كنّا بننزل البيسين بالبوركيني في أوروبا و أسيا و محدش كان بيمنعنا،، مادام خامة المايوة مخصصة للسباحة مفيش قانون يقدر يمنع صاحبته انها تنزل الماية هي مش نازلة بعباية و مش كل الناس بتعرف تلبس بكيني في ستات مش محجبة و مش مسلمة أصلاً بيلبسو بوركيني لأسباب شخصية متعلقة بهم".
واختتم :" والمستفز اكتر أنها لما نزلت بوست بالي حصل الناس فضلت تشتم فيها وتحتقرها وكأن ححابها دليل جهل أو تخلف أو شئ دون المستوي، والي عاوز أوضحه ان مهمتنا مش إن البنات تقلع الحجاب او تلبسه ولكن حرية اختيارها وتكفل القانون بحمايه حريه اختيارها باعتباره شئ من المباحات."
