كتبت – أماني موسى
شدد الرئيس عبد الفتاح السيسي، أن الأنظمة والدول التي تنادي بالتغيير وعليه يتم تخريب البلاد، يقدمون قناع مزيف بخلاف الحقيقة، بيقولوا التغيير، لكن ده وجه بيقدموه للناس، الوجه الحقيقي اللي عاوزين يوصلوا ليه هو تدمير الناس وتدمير الدول بدعاوى كاذبة وزائفة وتزييف الوعي.
وأضاف خلال كلمته اليوم بافتتاح مجمع التكسير الهيدروجيني بمسطرد بمحافظة القليوبية، "هفضل اتكلم على ده طول ما أنا موجود في مكاني، شوفوا الخراب اللي بيعملوه في العالم وفي الدول، وبيحولوا ملايين السكان للاجئين، وبيخربوا الدنيا ويقولوا إحنا هنجيب الدولة اللي هما بيقولوا عليها، ميصحش أقولها دلوقتي".
مستطردًا، "والله والله لن تقوم دول حتى على منهج ديني حقيقي أساسها مبني على خراب وتدمير كده، ده أمر ميرضيش ربنا.. ناس كانت عايشة آمنة مستقرة نخربهم ونخليهم يسيبوا بلدهم ويعيشوا في معسكرات اللاجئين عشر سنين، طيب هتبقى النتيجة إيه؟".
وتابع، "الطفل اللي كان عنده 10 سنين عايش في معسكرات لاجئين نتيجة الحالة دي، ودلوقتي بقى 20 سنة هيبقى إيه؟ هيشتغل ايه؟، هيروح يشتغل في ليبيا، ولو مخدتوش بالكم هيجوا مصر يدمروا مصر".
مشددًا على دور الإعلام باعتباره أداة تنوير وعليه يجب أن يتحدث الجميع عن الحفاظ على الوطن، بالإضافة إلى أن التعليم هو أساس بناء فهم حقيقي للمواطنين والشباب، "وأن يتم تحصين الشباب عشان بلدنا ووطننا مش عشان رئيس ولا حكومة أو شخص"
