بيتر عاطف
حجات كتير بتتباع بأسعار خيالية ومن الممكن تكون الحجات دي فعلا تستحق الأسعار الخيالية دي
لكن برده في حجات اتباعت بأسعار خيالية وكبيرة جدا وهي في الأساس حجات بسيطة وتافهة ومتستحقش الأسعار دي
هنوضح في الحلقة دي اكتر الحجات التافهة الي اتباعت بأسعار كبيرة جدا
لبانة او علكة مقابل 514 ألف دولار
في سنة 2019 قدر واحد من مشجعي نادي مانشستر يونايتد الإنجليزي ببيع آخر "لبانة" مضغها المدرب السابق للفريق السير أليكس فيرجسون في اخر مبارة له الي كانت في سنة 2013 مع الفريق الي تولى تدريبه لمدة 26 سنة
وتم عرض اللبانة في مزاد علني وبدأ من مبلغ 198 ألف دولار
وفي النهاية اتباعت اللبانة مقابل 514 ألف دولار
تمثال ارنب مقابل 91 مليون دولار
في سنة 1986 صمم الفنان الأمريكي "جيف كونز" تمثال لأرنب مصنوع من معدن مضاد للصدأ والتمثال شبيه بالاشكال الي بتتعمل من البالونات
وتم عرض التمثال للبيع في مزاد علني في سنة 2019
واتباع التمثال ده بمبلغ 91 مليون دولار
موزة مقابل 120 الف دولار
في شهر ديسمبر سنة 2019 عرض الفنان الإيطالي "ماوريتسيو كاتيلان " اخر اعماله الفنية في معرض بالولايات المتحدة
والعمل الفني ده كان عبارة عن موزة عادية جدا متثبتة على الحيطة بشريط لاصق
والاسم بتاع العمل الفني ده هو "كوميدي"
واتباعت الموزة دي مقابل 120 الف دولار
وده شجع الفنان الإيطالي انه يعمل نموذج تاني للعمل الفني ده في معرض للفنون في فرنسا
واتباع كمان النموذج التاني ده مقابل 120 الف دولار برده
وده شجع الفنان انه يعمل نموذج ثالث واتباع مقابل 150 الف دولار
ومن احد المواقف الغريبة ان واحد من الي اشتروا العمل الفني ده اكل الموزة بعد ما اشترها مباشرة
حذاء مقابل 615 ألف دولار
في شهر أغسطس وفي سنة 2020 عرض دار للمزادات حذاء رياضي للبيع
الحذاء ده كان ملك للأسطورة الامريكية في كرة السلة " مايكل جوردان"
الي ارتداه في سنة 1985 في الموسم الاول ليه مع فريق "شيكاغو بولز"
واتباع الحذاء ده مقابل 615 ألف دولار في المزاد
والغريب في الحذاء ده ان مقاس زوجين الحذاء مختلفين عن بعض
قطعة بسكويت مقابل 15 الف دولار
في سنة 2015 اتباعت قطعة بسكويت كانت على سفينة "تايتانك" ونجت قطعة البسكويت دي من الغرق مع السفينة في سنة 1912
والي احتفظ بقطعة البسكويت دي هو شخص اسمه " جيمز فانويك" الي كان أحد ركاب سفينة "كارباثا"، الي تحركت لإنقاذ ركاب سفينة "تايتانك" واحتفظ بها لما لقاها بالصدفة
وفي سنة 2015 تم عرضها في مزاد علني واتباعت مقابل 15 ألف دولار
فستان مقابل 4,8 مليون دولار
في عام 2016 تم عرض فستان ارتدته الفنانة الامريكية " مارلين مونرو" للبيع في مزاد علني
والفستان ده هو الي كانت لابساه مارلين مونرو في حفل عيد ميلاد الرئيس الأمريكي " جون كنيدي" في سنة 1962
وغنت اغنيتها المشهورة " happy birthday mr president هابي بيرثداي مستر بريزيدانت "
وبدأ المزاد بمبلغ 12 ألف دولار الى ان وصل الى 4.8 مليون دولار
صورة فوتوغرافية مقابل 4.5 مليون دولار
مصورين كتير بيفضلوا تصوير الناظر الطبيعية
وفيه صور بيكون سعرها كبير لاسباب كتيرة
لكن في سنة 1999 قرر المصور الألماني "أندرياس جورسكي" انه يصور "نهر الراين" الموجود في أوروبا
لكن مستحيل كان يتخيل المصور ده ان الصورة دي هتتباع في سنة 2011 مقابل 4.5 مليون دولار
والغريب ان كتير من النقاد شايفين انها صورة متوسطة المستوى
الانسان دايما عنده رغبة في اقناء الأشياء الثمينة والغالية وزي ما شوفنا ان الحجات الي سعرها كبير ده مش دليل على قيمتها الحقيقية
مراجع المعلومات :
DW News
BBC News
Sky News
جريدة الوطن
جريدة اليوم السابع
