رد الفنان تامر حسني على تصريحات الفنان أحمد السقا، والتي صرح بها بالأمس أثناء استضافة في برنامج «السيرة» مع الإعلامية وفاء الكيلاني، وذلك حين عاتبه بسبب موقف حدث بعدما حل كضيف شرف في فيلم «الفلوس»، وكتابة اسمه كبطل للفيلم مع تامر حسني، مما تسبب له في ضرر على حد قوله، ورغم مطالبته لتامر حسني بالتدخل إلا أنه فوت الأمر على حسب تصريحاته، مما دفع تامر حسني للرد على كلام «السقا» من خلال ستوري نشرها عبر حسابه الرسمي على موقع «انستجرام».
وقال تامر حسني: «حبيبي وأخويا وصديق العمر ونجم الدنيا كلها أحمد السقا، كنت أتمنى أنك تكلمني بيني وبينك لو كنت زعلان من أي حاجه غلط، إن الحاجات دي لايمكن تفوتك وأنا كنت أتمنى مكتبش الكلام ده هنا، بس علشان بعد كلامك في التلفزيون الجمهور الكريم بقى ليه حق إنه يفهم الصح».
وتابع تامر حسني: «عشان أفكرك بس.. أنت كلمتني وقولتلي في خبر في موقع وعليه صورة افتراضية للفيلم وكاتبين أنك بطل في الفيلم، وأنا رديت عليك إن دي اجتهادات صحفية، والصورة من تصميم المحبين اللي أكيد فرحوا بالخبر إننا مع بعض، حتى أنا مقولتش إن دي الشركة المنتجة لإنها شركة كبيرة ولا يمكن تعمل كده، لإن الفيلم متباع للخارج والداخل بإسم أخوك تامر حسني، وأصلا أفيش الفيلم الرسمي نزل والناس كلها شافته وأنت مش فيه ولا فيه أسمك، وكل الأبطال طالعين مرسومين معرفش زعلك من إيه الحقيقة، كان ممكن تزعل لو الكلام ده نزل على صفحتي أو صفحة الشركة المنتجة».
وأضاف تامر حسني: «وأنا شرحتلك ده من سنة وأتكلمنا بعدها مرتين، مرة عيدت عليك في عيد ميلادك والثانية بخصوص برنامجك، لو كنت لسه زعلان كنت هتقولي ساعتها الفيلم بقاله سنة يا أحمد، أخيرا بقى مستحيل الشركة تروج أو أنا أفوت أو أسمح باستخدام أسمك كبطل في الفيلم وأنت مش فيه، لإن ده هيعود عيلنا كلنا بالضرر، لإن الناس هتدخل الفيلم مش هيلاقوا الكلام ده فا يبقى أحنا كده بنضحك على الناس وضرينا الفيلم، ولأن أكيد يشرفني إن أحنا نمثل مع بعض بطولة مشتركة لأنك حبيبي بجد ونجم أنا بحبه من قلبي فعلا».
واختتم تامر حسني: «وبعدين يا حج أحمد لما أنا جيتلك مسلسلك حصل اجتهادات كتير من محبينك الكرام، شوية يقولوا المسلسل بطولتنا وشوية يقولوا لا ده ضيف شرف بس، وأنت عارف أنا عمري ما عملتها وطلعت ضيف شرف غير ليك، ده أنت طلبتني أجي أصور الساعة 8 الصبح كنت عندك في نص ساعة، عشان فكرة طلعت في دماغك فجأة وجيت لإنك غالي عندي أوي أوي فوق ما تتصور، وكنت بفرح بإجتهادات محبينك ومحبيني حتى لو صورتي صغيرة أو كاتبين بطولة أو ضيف شرف، كل ده مش فارق لأني جيت أخدم صديق عمري وأتمنى أي كلام يصب في مصلحة مسلسل أخويا وينجح ويكسر الدنيا، أنت حبيبي يا أحمد وصديق عمر، عشان كده أنا اللي مش هزعل منك، معلش طولت في الكلام لإن برضو زعلك يعز عليا».
