كتب – محرر الأقباط متحدون أ. م
قال الكاتب محمد قمر، تعليقًا على دعوات المقاطعة للمنتجات الفرنسية، علي فكرة المقاطعة مش هاتعمل حاجه مع فرنسا، إحنا حقنا مش هايجي إلا إذا فتحنا فرنسا وخليناها زينا كده بالظبط، الفتاكة بتاعة ماكرون دي هي نتيجة إحساسه بالفروق الحضارية الهائلة بينهم وبيننا، عندهم حرية وفكر وفلسفة ونظريات علمية ونقدية معندناش زيها، إحنا مرجعياتنا إللي بنقراها ونعيد قراءتها ونفكر من خلالها وحياتنا ماشية علي محتواها متغيرتش بقالها مئات السنين، إحنا ناس بنحب الثبات في كل حاجه ، إيه إللي هاناخده في الآخر لم نقعد نصلح ونغير ونطور غير حته قطنة، في حين هما عمالين يغيروا ويطوروا ويبدعوا ويخترعوا، هو ده إللي وصلهم للمسخرة وقلة الأدب وطولة اللسان والعنجهية وقال إيه حرية التعبير .
الحل الوحيد هو إنهم يبقوا زينا يقروا إللي بنقراه ، ويلبسوا إللي بنلبسه ، ويسمعوا إللي بنسمعه من غير نقاش ، ويثوروا جنسيًا لو شافوا شعر امرأة زي ما بيحصل معانا بالظبط ، يعيشوا زي ما إحنا عايشين ، عظمتنا في قناعتنا إن الحياة بالنسبة لنا ملهاش قيمة وبندعي ربنا في كل صلاة ألا يجعل الحياة هي أكبر همنا لكن هما مهمومين أوي بالحياة وعمالين يطوروا ويغيروا وآخرتهم سودا إن شاء الله.
وأختتم بقوله، المقاطعة مش هاتجيب نتيجة مع الأبالسة دول اللهم شتت شملهم واجعل أموالهم ونساءهم وأولادهم وسفنهم وسياراتهم وطائراتهم وغواصاتهم وعطورهم وكل مخترعاتهم غنيمة لنا.
