نهاد ابوالقمصان
السؤال الاهم
فين الامان وحياتك تنهار بكلمة يقولها حد من بقه ؟
تخيلى نفسك مرات هانى الاولى !! الحل ايه ؟
الاجابة ؛
١- ما تعلقيش احلامك على اكتاف حد لانك فى لحظة انتى واحلامك ودنيتك كلها ممكن هتترزعى على الارض 🧎🏻♀️🧎🏻♀️🧎🏻♀️وياتعرفى تقومى تقفى يا تتكسرى للابد
٢- انك تكونى قوية ومستقلة وتدخلى علاقة مبنية على المساواة مع شريك حياة ، مش تفطسى على عريس وبسبب السربعه تنسى احلامك وترميها فى الزبالة
٣- نجاح جوزك حاجة عظيمة جنب نجاحك انتى كمان مفيش حاجة اسمها تدوبى فى حد وتبقوا روحين فى زكيبة لانها ممكن تتخرم وتخر على دماغك
بصرف النظر عن الممثلة درة خالفت القانون التونسى واللا لا
او ان هانى طلق مراته واللا اتجوز عليها
الله يكون فى عون مرات هانى الاولى ( حقيقى متعاطفة معاها جدا )
لو كل راجل او ست حط نفسه مكان مرات هانى الاولى .. احساسه ايه ؟ زى القمر وحياتك مستقرة ومعاكو ٣ اولاد فى اعلى مستوى معيشة وفجأة صحيتو على حادثة قطر🚞🚄 فرمت حياتكو
لو حادثة بجد يمكن اهون ،، كنتى تقولى راضية بقضاء ربنا
لكن الحادثة قضاء البيه .. اللى حطيتى عليه كل احلامك
الدرس المستفاد ايه لكل بنت او ست ؟
ازاى تسيبى طموحك وشغلك وحياتك وتحطى احلامك على واحد علاقتك بيه معلقة بكلمة 😬
زوجة هانى زى الالاف من الستات كانت عايشة مستقرة جدا باعلى مستوى دخل 💲💲وحياة تحسد عليها🎺🎷🥁 ،
لو فكرت تشتغل هتقول شغل ايه الى ما يكفيش بنزين عربيتى 🚙🚗
دا اليوم اللى بخرجة مع العيال بصرف فيه مرتب شهر
تبص للستات اللى بتشتغل ومتحققه وناجحة 👩🏻🍳👩🏽⚕️👩🏼🏫 على انها بتجهد نفسها عالفاضى ،،
وطبعا بتشير كوميك تريقة على ( سترونج الاندبندن وومن ) 😂
تبص على تعب البدايات والمرتب الصغير فى الاول وتقول ياه اتبهدل واتعب علشان كدا بس ومش واخدة بالها ان التعب بيبنى خبرة قبل الفلوس
فجأة ،،، لقت نفسها فى الشارع ، فى اللا شئ
الخيارات المتاحة ؛
- تتنازل حتى عن ولادها لان مش هتقدر تصرف عليهم ( الا لو وارثه )
- تقعد معاهم متفكرش فى اى حياة خاصة بيها
- تدخل ثلاجة الزمن وهي لسة فى عز شبابها ، علشان بس ترضى الباشا ويبعت فلوس تعرف تاكلهم وتعيشهم نفس المستوى
حياتها انتهت وهى لسة فى عز شبابها
هانى طلق مراته واللا على ذمته مش دا الموضوع
الموضوع القانون المصرية اللي سايب الستات تترمى فى الشارع واى كلام عن اى تعديل يضمن اى امان الاسرة والاطفال ،، يترفض
القانون التونسى وقوانين دول اسلامية كثير بيمنع التعدد
والطلاق بطلب قدام المحكمة للطرفين
لان ما ينفعش نقول للست ان بيتك وبس اهم حاجة فى حياتك ، واول ما تتجوز جوزها يتخانق علشان تسيب الشغل فتضطر تسيبه لانه مستخسر يجيب شغاله تساعهم
فتسيب الشغل وتشتغل خدامة وسواقة ودادة وممرضة ومدرسة وكل حاجة ويرجع يشتكى انها مش واخده بالها منه 🤔😏😏،،
حتى الست المزة القمر الهانم الشيك ،، اتجوز عليها ☹️
وبناء عليه فى اي لحظة ممكن تترمى فى الشارع ☹️😞😟
ما ينفعش نقول لاى بنت او ست سيبى اللى وراكى واللى قدامك وادى عمرك لراجل اقفى جنبة وكبريه
ومش بس كدا
تسعدى وتنشكحى بنجاحة
وانتى عاملة زى المثل بتاع ( يا مربى فى غير ولدك يازارع فى غير ارضك )
او ( ربى يا خيبة للغايبة )
واول ما يكبر يدور على واحدة تانية ويرميكى بكلمة
هل ممكن ست تفرح بنجاح جوزها 🤔
هل ممكن ما تقلقش لما الفلوس تكتر معاه🤔
اه ممكن
- لو القانون عادل بيضمن لها حقها وامانها ( زى تونس 🇹🇳 )
- او بيديها نص ثروته مقابل خدمته 💲💲💲
- او لو هى كمان ناجحة ومتحققة
ساعتها لما القطر يفرم حياتها 🚞🚄
هتبقى الخسارة فى المشاعر 😞😞
شوية زعل وهيروحو
مش الخسارة فى العمر كله
الله يكون فى عون مرات هانى الاولى
ويكون فى عون اي ست عندها فقر فرص
او سمعت كلام اى حد وحطت احلامها على اكتاف حد تانى
امان الست فى شغلها وانها تكون قوية وتتجوز راجل قوى زيها يحترمها كشريكة لحياته ، ساعتها هيعملها حساب ويعيشو فى سكن ومودة ولما ما يستريحوش يتفقوا على انفصال محترم
مش تطلع على النت تقول متجوزين .. ودرتها قصدى .. ضرتها تقول لا طلقها 😏😏
معلومة ؛ اغلب الدول الاسلامية يإما مانعة التعدد زى تونس
يأما مقيداه باذن القضاء زى المغرب
استنادا الى القرءان نفسه
فَانْكِحُوا مَا طَابَ لَكُمْ مِنَ النِّسَاءِ مَثْنَى وَثُلَاثَ وَرُبَاعَ فَإِنْ خِفْتُمْ أَلَّا تَعْدِلُوا فَوَاحِدَةً [النساء:3]، ويقول في آية أخرى: وَلَنْ تَسْتَطِيعُوا أَنْ تَعْدِلُوا بَيْنَ النِّسَاءِ وَلَوْ حَرَصْتُمْ [النساء:129]
- ولو حرصتم تخرم اى عين
احنا بنقرأ بطريقة ( لا تقربو الصلاة)
