قال المنتج نصر محروس إن خلافاته مع المطرب بهاء سلطان سببها عدم التزامه مع شركته الإنتاجية التي كانت وراء اكتشافه ودعمه وشهرته، وتابع خلال استضافته في برنامج «شوتايم»، على قناة «cbc»، مع الإعلامية هبة الأباصيري: «المسألة مبتتحسبش كده، بهاء لازم يحترم الشركة ويديها حقوقها، جه من ورا الشركة وقدم تترات مسلسلات وقدم أغاني سينجل إحنا منعرفش حاجة عنها».
فردت «هبة» :«بهاء سلطان مختفي عن الساحة، والناس مفتقداه جدا».
وانفعل «محروس» على «هبة» حين أوضحت له أن الأمر لا علاقة له باستضافته في برامج أو تلقيه مقابلا ماديا بقدر ما يرتبط بممارسة نشاطه الفني وغناء الأغاني وإحياء الحفلات، وقال: مش عايزة تسمعيني ليه؟ مش بتشوفيه في برامج؟ مش بيكسب منها؟، الإعلان بتاع بنك مصر أنا مقولتلوش لأ.
وشدد «محروس»: الناس فاكرة إني مش عايز بهاء يغني، وأنا لا أملك في إنه يغني أو ميغنيش، أنا مش ضد بهاء سلطان، بهاء مثلا غني في برنامج «صاحبة السعادة»، وحصل على 400 ألف جنيه، ومحدش خد باله إن عقدي معاه فيه واجبات وحقوق، فيه مصاريف إنتاج، تدوير على الأغنية، مينفعش تعمل جزء، تغني ومتدفعش الباقي، المفروض الشركة ليها نسبة 50 % تاخدها، وكل طرف ليه حقوق وواجبات، وهو ده سبب خلافي مع بهاء سلطان، بهاء عليه 4 أغاني في الألبوم اللي كان أخير معايا، وكان المفروض يعيدها، وكمان عليه فلوس الأغاني والنسبة دي.
وتابع: «مكانش ينفع إنه يمشي كده من الشركة، مش فيه حقوق يديها وبعدين يمشي، هو ينفع يمشي كده؟ ويروح يمضي مع شركة روتانا، وهو عنده مشاكل قانونية مع شركة أخرى، استغربت روتانا كمان الصراحة، إزاي يمضوا معاه وهو لسه على قوة شركة تانية وعنده مشاكل معاها؟». ووجه «محروس» رسالة إلى بهاء سلطان: ليه تخلي العمر يجري؟ وليه تعمل مشاكل؟ ماتخش تعمل الشغل اللي عليك وتمشي».
